عبرت الفنانة سمية الخشاب عن شدة سعادتها ، بنجاح أحدث أغانيها الموجة، والتي طرحتها خلال الأيام القليلة الماضية عبر قناتها الرسمية على يوتيوب ومختلف منصات الموسيقى في الوطن العربي.
وقالت سمية الخشاب خلال حوارها مع برنامج ET بالعربي: أنا عملت دعاية وصورت في البيت بلبس غير بتاع الكليب، ومن بعد نص ساعة ما نزلت الفيديو على تيك توك لقيته بيعد مشاهدات وبقى 5 ملايين مشاهدة، وفي 3 أيام على مواقع التواصل الاجتماعي مشاهداته تخطت الـ 13 مليون وده رقم أنا مكنتش أحلم بيه الكليب لسه منزلش يا جماعة.
وأضافت سمية الخشاب: أنا سعيدة جدًا بنجاح أركب على الموجة، والنجاح كان غير متوقع في ساعات من نزولها، خاصة أن الأغنية نزلت في وقت صح في ظل الأجواء اللي إحنا فيها وانقطاع الكهرباء والناس اللي متعودة على التكييف، وإحنا صورنا الكليب في وقت صعب أوي وفي الغردقة ودرجة الحرارة فيه 40، وكل الفنادق كانت مليانة فكان صعب إننا نصور من غير ما الناس تبقى باصة على الكاميرا كنا بنعاني من ده.
وتابعت: لكن الحمد لله المكان اللي صورنا فيه كان فيه ناس أجانب ورانا ومكنوش مركزين مع الكاميرا والحمد لله تفاعلوا أوي مع الأغنية وكانوا مبسوطين بيها.
وأما عن كواليس اختيارها لـ الأغنية، قالت سمية الخشاب: الأغنية جريئة وجميلة شبابية ولذيذة وخفيفة للصيف، وشيلنا كلمات وحطينا مكانها كلمات تانية، وهي مناسبة جدًا للوقت ده، وقالوا لازم تتصور فيديو كليب.
كما علقت سمية الخشاب على انتقادات الجمهور لبعض كلمات أغنية الموجة، قائلة: بقول في الأغنية أنفخ عوامة مفسية ودي جملة عادية، بس إحنا مصريين دمنا شربات وبناخد الحاجات في الإطار اللي بيضحكنا، ودي خفة دم المصريين لازم نتوقع منهم دي، ولما جيت وقت تغيير الكلمات في الأغنية قولتلهم الكلمة دي جريئة والناس هتحط عليها كلمات، ولكن ده العادي ده كلام الشارع.