كانت الفنانة زينة ضيفة برنامج صاحبة السعادة مع الإعلامية إسعاد يونس، وتحدثت خلال الحلقة عن تفاصيل مشاركتها في مسلسل حضرة المتهم أبي مع الفنان القدير الراحل نور الشريف.
وقالت زينة: «في مسلسل حضرة المتهم أبي، نور الشريف قالي نفسي ابقى بنت عشان اعمل دورك، وخدت فيه جوايز كتير».
وأضافت: «ونور الشريف كان بيقولي اسماء الجوائز وقولت الراجل بيقولي كده عشان اعمل الدور كويس ومكنتش حاسه، كنت في أولى جامعة وكنت عاملة ظاظا وسيد العاطفي والدنيا بدأت تتفتح بعد العمل مع نور الشريف».
وتابعت زينة: «أنا كنت جريئة وقتها واللي رشحتني الاستاذة رباب حسين وبنتها صحبتي وكانت بتشوفني دايمًا عندها في البيت وصاحبتي وقالتلي انا مرشحاكي وبعد يومين قالتلي نور مش موافق عليكي خالص، روحت قولتلها على فكرة بيمثل وحش وأنا مش من جمهوره ده المفروض يفرح وكنت هبلة ومسكوها طبلة».
وأردفت: فنور الشريف قالها زينة اللي بتلبس ماركات هتعمل الدور ده؟ وأول يوم تصوير كنت هموت واعمل الدور حلو وكنت داخلة ولا كأني نجلاء فتحي ودخلت البلاتوه فـ روحت معيطة وطلعت اجري».
وأكملت زينة حديثها: «وهو اللي جري ورايا قولتله انا اسفه انا مبعرفش امثل وعبيطة ومتاخدش على كلامي، راح قالي انتي لو مكنتيش خوفتي انا كنت همشيكي وقالي يلا عشان ندبح العجل، كان بيساعدني وبيذاكرلي ويسمعلي ويتكلم معايا ووقت الفطار ينده عليا».