تحدثت الفنانة رنا رئيس عن أعمالها الفنية خلال مسيرتها، وبداية دخولها عالم الفن دون مساعدة أو واسطة من أحد.
وعن مسلسلين رنا رئيس الآخرين، أزمة منتصف العمر وموضوع عائلي، اللذان حققا نجاحات كثيرة، قالت في لقائها مع الإعلامي معتز الدمرداش، ببرنامج ضيفي: الحمد لله كنت محظوظة جدا في المسلسلين دول والاتنين اتعرضوا ورا بعض على طول، وحظي إن أزمة منتصف العمر كان عليه جدال ونجح جدا، وكان دوري فيه مختلف جدا عن موضوع عائلي، فكان تحدي بالنسبالي إني طالعة من دور البنت الكيوت للبنت الغيورة على جوزها بشكل تاني خالص.
وأضافت رنا رئيس: حسيت إنها نقلة بعد العملين دول، وموضوع عائلي تحديدا بعتبره نقلة كبيرة ليا مع الجمهور، وأزمة منتصف العمر وموضوع عائلي 2 وسعولي عيلتي من ناحية الجمهور وخلوني أتشاف أكتر، وخلوا أمهات يشوفوني زي ولادهم ودي حاجة كبيرة أوي عندي.
وعبرت رنا رئيس، عن شدة سعادتها بتلك الخطوات التي تخطوها في مشوراها الفني، حيث قالت: مش هقدر أقول غير إن كل ده توفيق من عند ربنا، أنا كنت بسعى وربنا بيرزقني وبحلم وأصدق الحلم وربنا يكرمني بيه، وأنا صبورة جدا وبتقبل النقد كله الحلو والوحش.
وتابعت رنا: بخاف من النقد الحلو بزيادة عشان أخاف تبقى مجاملة، ومفيش بني آدم معندوش عيوب في المجال بتاعه، والنقد اللي بيجيلي من ناس بتنتقدني كبشر مش كممثلة، بيضايقني يومين وتلاتة وخلاص.
كما تحدثت رنا رئيس كيف بدأت مشوارها الفني، بعيدًا عن الوسائط والمساعدات، وقالت: دخلت مجال التمثيل عن طريق الإعلانات وكاستينج لمسلسلات وإعلانات، وبرغم إن مامتي بتشتغل في المجال شوية، هي ميكب أرتيسيت، بس مكنش ليها دور خالص في إني أمثل.
وأضافت : بدأت بس تشجعني لما لقيتني دخلت ونجحت، وبدأت تقولي فيكي ممثلة، مع إنها مكنتش شايفة ده من الأول، وكنت بروح كاستينج كتير ومتبقلش ساعات ومش بيأس كنت بقول مش نصيبي، وفضلت أتقبل الرفض لحد ما روحت عملت كاستينج لمسلسل وضع أمنى مع عمرو سعد، وعملت كاستينج في نفس السنة لمسلسل أرض جو مع غادة عبد الرازق، واتفاجئت إني اتقبلت في العملين ودي حاجة مكنتش متوقعاها، وكنت شايفة نفسي عليهم جدا في البيت برغم إنهم كام مشهد.
رنا رئيس: كنت بشعة في أول عمل ليا
وتحدثت رنا رئيس، عن ذكريات أول مشهد قدمته، قائلة: أول ما دخلت أول مشهد في مسلسل أرض جو مكنتش فاهمة حاجة أوي، كنت متوترة جدًا بس عندي كبرياء يخليني مقولش إني متوترة، كنت حافظة كويس جدا وطلعت أوحش حاجة؛ لأني نسيت كل حاجة، وفجأة نص وش مش بيتحرك لأني متوترة جدا، وبعترف إني كنت بشعة.
وأوضحت رنا رئيس، إنها من الممكن أن ترفض أدوارا تُعرض عليها، بسبب تطلبها للسفر خارج مصر، وقالت: ساعات برفض مسلسلات بسبب إن فيها سفر؛ لأني عندي خوف إني أكون في حتة بعيدة عن أهلي، لازم أكون مع أهلي، برغم إني صورت في موضوع عائلي في بلغاريا بس مامتي كانت معايا فمكنش في مشكلة.
وتابعت رنا: كمان صورت في أزمة منتصف العمر في لبنان، وعشان أنا فعلا بخاف أقعد لوحدي في أوضة في أوتيل، فـ ريهام عبد الغفور هي اللي أقنعتني لأني كنت رافضة بسبب خوفي من السفر، فكنت بروح أبات معاها في الأوضة، وكان لازم دايما أبات عند حد أو أخد حد يبات معايا.
لمتابعة أوان مصر عبر يوتيوب اضغط هنا
لمتابعة أوان مصر عبر فيسبوك اضغط هنا