تحدثت الفنانة رانيا فريد شوقي، عن والدها في ذكرى وفاته، وحول مقترح لعمل مسلسل يجسد قصة حياته.
وقالت رانيا فريد شوقي خلال مداخلة هاتفية لبرنامج “لمن يهمه الفن” تقديم أميرة نور على نغم إف إم، أنا وأهلي لسه عايشين في خير والدي فريد شوقي، وهو أب يستحق كل حب وتقدير.
وأضافت: أذكر مرة إنه نصحني دايما أقول “بسم الله ما شاء الله والله أكبر”، فأصبحت دايما بردد الجملة الجميلة دي، كمان قال لي إن البساطة والتواضع وحب الناس نعمة.
وتابعت: فيلم “قضية عم أحمد”، من الأدوار اللي بحبها وبشوف فيها فريد شوقي بدور الأب اللي بيجمع العيلة وبيخاف على كل واحد.
وصرحت: كان في مقترح لعمل مسلسل يجسد قصة حياة والدي، ولكن مش عارفة الموضوع وصل لحد فين مع ناهد أختي، أما بالنسبة لاختيار البطل اللي يجسد دور “فريد شوقي” لازم يكون وجه جديد، خصوصاً في سنه الصغير، بالنسبة لي فريد شوقي له طابع مختلف وفعلا مش عارفة ممكن يكون مين، ولو اتعرض عليا أطلع في المسلسل بدور رانيا فريد شوقي طبعا هوافق.
وأردفت: أتمنى يكون في متحف يضم مقتنيات الفنانين، ركن لفريد شوقي، وركن لفاتن حمامة، وهكذا، كمان أري إن والدي بحكم إنه خريج الدفعة الأولي بأكاديمية الفنون، المفروض يكون فيه قاعة باسمه تقديرا له.
وأتمت: أقول لوالدي في ذكراه وحشتني قوي، وبشعر إن الفن مالوش أب روحي من بعده، كان “فريد شوقي” دايما مهموم بمشاكل السينما ومن بعده الفنان الراحل نور الشريف.