سردت إحدى اقارب الراحلة ماي اسكندر ضحية السرعة الجنونية والتي لقيت حتفها على يد نجل رجل الاعمال ” هيثم كامل ابو علي” ، وذلك من خلال منشورًا دونته عبر صفحتها الرسمية فيسبوك ، في عدة سطور ، اوضحت من خلالها ، مدى براءة تلك الفتاة التي لقيت مصرعها دون ارتكاب أي ذنب ، وذلك تأثرًا بالحادث الأليم التي تعرضت له المهندسة الراحلة ماي اسكندر جيد على احدى الطرق حال عودتها إلى القاهرة.
وجاء برسالة أبنة خالتها دينا شامة الآتي:
حكيلكوا حكايه بنت عمتي
بنت جميله اسمها ماي اسكندر جايد
اهلها تعبوا فيها و بقت مهندسه بتفرش احلي بيوت في مصر
راحت الغردقة يوم الجمعه 22/1/2021 عشان عندها شغل هناك و كانت راجعه يوم السبت..
بس مارجعتش
كلنا لسه مش قادرين نفهم يعني ايه مارجعتش و هنقعد كتير اوي مستنينها ترجع
مارجعتش عشان كان في نفس الوقت واحد اسمه هيثم كريم كامل ابو علي اقل ما يقال عنه انه مستهتر كان سايق بسرعه جنونيه و ماشي عكس الاتجاه في الطريق بين سهل حشيش و الجونه و بيقولوا عمل حادث تصادم في سياره اوبر اللي كانت .
راكباها ماي
قتلها و قتلنا كلنا من وجعنا عليها و علي حقها
عملت ايه شابه مهندسه ناجحه رايحه تاكل عيش انها ماترجعش
ازاي مش هترجع لحضن اهلها و اصحابها اللي مستنينها ، ترجع عشان تكمل شغلها، ترجع عشان تعيش حياتها و تتمتع بشبابها
عشان هيثم كان مستعجل ولا كان تحت تاثير كحول او مخدرات زي ما اتكتب في المحضر بس يا رب يفضل مكتوب
اصل اهله ممكن يعملوا المستحيل عشان مايتحبسش، عشان يعيش حياته و يتمتع بشبابه و يفضل يعمل حوادث و يعور و يموت ناس و يدفعوا شويه فلوس ، مش مشكله دي ابسط حاجه عندهم
ماهو كل مره بيطلع عادي اشمعنا المره دي ؟؟
عشان المره دي ماي و ماي غاليه اوي اوي يا هيثم و الفلوس مش هترجعها
عشان انت و اللي زيك لازم تعرفوا ان فلوسكوا مش هتحميكوا مهما حميتكوا زمان
عشان التهديدات و المحسوبيات مش هتنفع المره دي
عشان ربنا حق و عدل و ماي ليها حق و كان ليها حياه و مستقبل و انت ضيعتهم
يمكن هي مشيت عشان تعلمنا المسئوليه شويه
حبيبتي كانت دائما تقولنا خلوا بالكوا متسوقوش بسرعه
معقول هي اللي تروح هدر كده في حادثه عربيه
ربنا يرحمك يا ماي و يصبرنا و يقدرنا نجيبلك حقك المره دي
عشان انتي واحده من الناس اللي ماينفعش حقها يروح
واختتمت دينا عبر صفحتها الرسمية بموقع فيس بوك ، رسالة شكر للقضاء المصري ، لثقتها التامة بإن القضاء لن يضيع حق المهندسة الراحلة.