تحدثت الفنانة دنيا ماهر عن دروها وكواليس التحضير في مسلسل كوبرا بطولة النجم محمد عادل إمام، الذي يعرض ضمن الجزء الثاني من موسم رمضان الحالي 2024 من إخراج أحمد شفيق، تأليف أحمد محمود أبو زيد
وقالت دنيا ماهر في تصريحات خاصة لـ أوان مصر، إن تجربة كوبرا ممتعة للغاية، معقبة: «محمد عادل إمام واخد أخلاقيات وذوق ولطافة والده الزعيم عادل إمام أنا اشتغلت مع الزعيم صحيح مشهد صغير ولكن شوفت تعامله، نوع من الأدب والأخلاقيات إزاي يفرحك في اللوكيشين فتتبسطي فتشتغلي أحسن حقيقي محمد ابن أصول حقيقي أتبسطت جدا إنسانية وفنية حقيقي، أستاذ أحمد شفيق طبعا أول مرة أشتغل معاه مخرج كبير وعظيم وحسيت بالإمتنان إنى قدرت أشتغل معاه تاريخ عظيم وكبير، أستاذة صفاء الطوخي بحبها جدا، أستاذ أحمد فتحي من معجبينه فإني اقف قدامه حاجة عظيمة التجربة كلها كانت جميلة وممتعة».
وأضافت: «دوري فكوبرا مش كبير لكن الشغل كان كتير جدا الكواليس كلها جري بيشتغلوا بكامل طاقتهم لأن أغلب الشغل أكشن وبياخد وقت في التصوير كتير ومع ذلك كان دايما محفظين علي الهدوء واللطف في التعامل ودي حاجة أنا بقدرها».
وأشارت إلى أن شخصية سماح مختلفة عن شخصية نجلاء، متابعة: «لا يوجد وجه للشبه سماح فيها جانب سودوي شوية مش شاكرة ربنا ويمكن ده الي بيجلبلها النكد في حياتها، لأنها مش.. بتحب ربنا أوي».
واستكمل تصريحاتها لـ أوان مصر قائلة: «مكنش صعب اوفق في مواعيد التصوير لأن في الأخر الموضوع كان ماشي بسلاسة مكنش في صعوبة إني أقدم دور غادة لأن مختلف عن كوبرا».
وعن رأيها في مسلسلات الـ15 حلقة، قالت: «أنا مع أن المسلسل يخلص لما الحدوتة تخلص زمان كان في مسلسلات 13، 12، 21 حلقة، مكنش في رقم محدد دلوقتي بقينا ملتزمين بشركات إعلام عايزة تعرف هتعمل اي علي حسب القصة، وبيساعد نبقا أروق شوية تصوير 12 ساعة مش لازم الساعات الجنونية الي كانت تحدث فأكيد مريح لكل الناس».
وأضافت: «والممثل مبيبقاش متحكم في نوع الأعمال الي بتجيلوا السنادي كان معروض عليا أكثر من عمل ولكن سبب ضيق الوقت والسفر أو دور مقرر فكنت بعتذر يمكن سماح نفس منطقة نجلاء ولكن مختلفة كل واحد لي بصمة غير التاني».
وعن الدور التى تتمني تقدمه، قالت الفنانة دنيا ماهر: «نفسي أعمل شخصية رئيسة عصابة ست مفترية وقوية حاجة جبارة كده نعوض فيها، نعمل الحاجات اللي مش بنعملها في الحقيقة».
ووجهت الفنانة دنيا ماهر رسالة إلى جمهورها قائلة: «بقول الجمهور كل سنة وأنتوا طيبين يارب العيد ييجي علينا وإحنا شايفين فلسطين فحال أفضل والمجازر اللي بتحصل تقف وأتمنى لكل الناس الشعور بالرضا والأمتنان والفرح والسعادة».