هاجمت الإعلامية دعاء فاروق، الفنانة لقاء الخميسي، بعد انتقادها لرجال الدين ووصف ما يقدموه بـ “الأفكار المسمومة”.
فقد كتبت لقاء الخميسي عبر حسابها الرسمي بموقع التواصل الاجتماعي “إنستجرام”: “احنا مش محتاجين اشخاص زينا يفسر لتا الدين .. اختا محتاجين نتعلم نقرا ونفكر ونتعلم نحب ونتفهم . كفاية بقى أفكار مسمومة .. زهقنا”.
دعاء فاروق تهاجم لقاء الخميسي بعد انتقادها لرجال الدين
لتعلق دعاء فاروق على المنشور، قائلة: “تمام يا أستاذة عندك حق …. انتي صح احنا حتى مش محتاجين أشخاص زينا يفسروا لنا الفلسفة وعلم النفس مفيش أسهل من علم النفس علي فكرة … كتب علم النفس مرمية برخص التراب في سور الازبكية نشتري ونذاكر ونفهم ونتفهم ونحب ونتحب ونقب علي وش علم النفس بقي .. ليه نحترم استاذ علم النفس اللي درس وخد دكتوراه في تخصص معين في فرع من فروع علم النفس ايه الزهق ده ؟؟”.
وأضافت: “احنا زهقنا بصراحة من الناس اللي بتتخصص دى يا جماعة … ارموا التخصصات دى كلها في الزبالة … اوعوا بقي يا كماحة انا زهقت .. اي علم في الدنيا لا يكيل بالبتنجان علوم شرعية وعلوم فقهية وعلوم جيولوجية وعلوم مقارنة أديان وايه علم الاجتماع ده كمان ؟؟؟ ده مفيش أسهل من اننا نشتري كتاب علم الاجتماع لابن خلدون ونقراه ونبقي أساتذة علم اجتماع علي سن ورمح”.
View this post on Instagram
وأردفت: “وايه ابن خلدون ده راخر ؟!!! هو احسن مني في ايه ؟؟؟ عنده مخ وانا معنديش يعني ؟؟ … طب ده لو جه دلوقتي انا هعرفه مقامه … ولا هيعرف حاجة في علم الاجتماع بتاعنا دلوقتي…. الدنيا اتغيرت جدا وانتو لسه بترجعوا لابن خلدون ؟؟!!!! “.
واختتمت دعاء فاروق: “ده تخلف ورجعية وعربية كارو ماشية بظهرها عالكوبري … وايه ابن سينا ولا الرازي ولا وابن النفيس مين الناس دى يا جماعة أحرقوا ميتين ام الكتب الكئيبة دى خلينا نفرفش كده ونبدأ علي نضافة بقي … العلم في الراس مش في الكراس اجدع.. وسمعني باجي وفي ايدى الرضعة عشان اغدى النونة كيفي كده كيفي كده واللي اقوله هنمشيه”.