أعرب الفنان والإعلامي خالد عليش، عن استيائه الشديد من الجروبات النسوية والصفحات الكبرى التي تدافع عن الست، دون أن تكون على دراية بالخلاف بين الرجل وزوجته، وذلك بعد حصوله على حكم برؤية ابنته.
وكتب خالد عليش، عبر حسابه الرسمي بموقع التواصل الاجتماعي “فيسبوك”: “النهاردة أنا خدت حكم تاريخي يا رب يتنفذ على خير، وتاريخي لأنه أحسن حكم ممكن أخده في ظل ظروف قانون الأسرة السيئ لحين تعديله، واللي طلع الحكم قاضي، مش واحد صاحبنا فده معناه إن الراجل قرأ، وفهم وبيدي لكل واحد حقه”.
وأضاف: “لكن جه الوقت اللي اقول فيه اللي جوايا، حسبي الله و نعم الوكيل، انا خصيم لكل واحد او واحدة حتي يوم الحساب ساعدو بشكل مباشر او غير مباشر اني ما اشوفش بنتي بطريقة انسانية، كل حد كبير او صغير جريت وراه بالمكالمات عشان اشوف اي حلول ودية، حتى الحركات و الجروبات النسوية اللي بيدافعو عن الست و خلاص.، اي حد بيكتب تعليق و هو مش فاهم حاجة، فاض بيا الكيل و العمر بيعدي و استحملت الكثير من الاتهامات الباطلة و علاقتي ببنتي بتبوظ يوم بعد يوم”.
خالد عليش بعد حكم رؤية ابنته: حسبي الله ونعم الوكيل.. أنا خصيم الجروبات النسوية اللي بدافع عن الست
وأردف خالد عليش: “وانا ملتزم بكافة الالتزامات المادية ناحيتها من اول يوم كاملة و زيادة كمان عن المستوي المادي و الاجتماعي اللي عايشين فيه و مع ذلك استحملت كتير و ماردتش، انا لا حول لي ولا قوة حاولت مع كل الحلول الرسمية و الغير الرسمية.، تعبت من اللف في دوائر مغلقة، تعبت من نظرة والدي و والدتي المريضة اللي نفسهم يشوفو حفيدتهم و مش قادر اعملهم ده، انا اوحش رجل في العالم و لكن ما استحقش اني ما يكونش عندي فرصة اتكلم و اخرج معاها و افسحها عشان علاقتي بيها تبقي كويسة، محدش يقولي انت السبب عشان سيبت ماماتها”.
وتابع خالد عليش: “انا و والدتها كان في بينا عشرة طيبة و ايام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي، حدش يقولي ما انتا كنت زوج وحش و .. و .. انا يمكن مكنتش احسن زوج برغم اني عملت اللي عليا كتير و اجتهدت كتير عشان اسعد الطرف التاني ولكن ده مش معناه اني انسان وحش و مستحقش فرصة تانية ومستحقش اشوف بنتي، محدش يقولي ما انتا مبسوط و اتجوزت تاني، انا فعلا الحمدلله زي الفل و مبسوط اني اخدت فرصة تانية ربنا يكرمني فيها و اكون انسان افضل و استمتعت ب حق ربنا سبحانه و تعالي و المجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه”.