مازال «إسلام محمد» يعاني من ضياع شقى عمره بعد استيقاظه هو وزوجته على رائحة «شياط»، النيران في كل مكان، والدخان يحاوطهما، مشاهد مرعبة كانت من نصيب العروسين “إسلام محمد وندا عيسى” بعد ساعات من زفافهما.
وقال إسلام: «مش عارف أعيش حياة طبيعية تاني زي ما كنت عايش، حقي بيضيع ومحدش واقف جنبي.. محدش يعرف حالتي النفسية عاملة ازاي».
وأستكمل حديثه: «أنا والله الشقة زي ما هي مش عارف اتصرف فيها مع صاحب الشقة، ولا عارف اعمل ايه في حياتي وعفشي، سبنا البيت وقاعدين في استديو حاص بجيرانا، أوضة وصالة مفروشة».
وكانت بداية الواقعة عندما قرر “إسلام محمد” 26 عاماً، يعمل مندوباَ في شركة سياحة، اصطحاب زوجته “ندا عيسى” من طنطا إلى عش الزوجية بالغردقة، وقبل أن يتناولا العشاء ويذهبا للنوم، قال إسلام: «جبت جبن ولانشون بعد ما وصلنا نتعشى منها، وسبت الباقي عادي في التلاجة ودخلنا ننام بعد تعب السفر».
وأستكمل حديثه: «لقيت النار في كل حتة، وصوت الخبط علينا من الجيران عشان يسعفونا، حاولت أنقذ مراتي، واطلعها برة الشقة، وساعدوني الجيران أطفي الحريق اللي خد كل حاجة، كل العفش راح».
بصوت يغلب عليه الحسرة وقلة الحيلة، أكد العريس أنه يعيش حالة صدمة بعد ما حدث له من حريق آثاث منزله، بل وسقوط الجدران بسبب شدة الحريق: «الخرسانة بتاعة الحيطان بانت من شدة الحريق، كل العفش اتحرق، شقى عمري راح قدام عنيا».
عيب تصنيع بالثلاجة كان سبب انفجارها، واندلاع الحريق وفقاً لما أكده “إسلام محمد”، بعد تقرير معاينة المباحث والأدلة الجنائية، التي أكدت عدم وجود شبهة جنائية، وتوصلت المعاينات الكهربائية لوجود عيب في تصنيع بالثلاجة، وهي ألمانية الصنع، أدى لانفجارها بعد ساعات من تشغيلها: «التلاجة انفجرت والكهربا سليمة كلها، والعفش اتدمر ملحقتش افرح في خمس ساعات كله راح».
على الرغم من معرفة أسباب الحريق، إلا أن الشركة المصنعة اكتفت بالاعتذار للعميل الذي أصابته كارثة بسبب عيوب التصنيع الفنية، الأمر الذي دفعه لتحرير محضر رقم 4268 قسم أول غردقة إداري، إلا أن الأمر لم يتم حله حتى الآن: «بقالي شهر وأكتر عامل المحضر، والشركة مصلحتش اللي حصل ولا عوضتني، عاوز حقي، ده شقى عمري راح بسببهم».