عبر الفنان حسين فهمي، رئيس مهرجان القاهرة السينمائي الدولي، عن فرحته بنجاح الدورة الـ 44 من المهرجان، مشيرًا إلى أنه أصر على إثبات قدرته على التفوق على كل التوقعات المطلوبة للدورة.
وقال حسين فهمي، خلال تصريحات تلفزيونية، على هامش فعاليات ختام مهرجان القاهرة السينمائي بدورته الـ 44: «أنا سعيد جدًا بالفترة اللي فاتت وإقبال الجمهور، كانت نسبة مشاهدة عالية جدًا وأنا متابع والحقيقة الأرقام رائعة جدًا، وعندنا دور عرض في كل مكان وكلها أنشطة مختلفة».
وأضاف:« كان عندنا ندوات وسعيد بالنشاط ده، ورممنا فيلمين من أهم الأفلام في تاريخنا، كان عندنا زخم كبير في الأفلام، إحنا عدينا الـ 100 فيلم من أكتر من 50 دولة وعندنا لجنة تحكيم قوية جدًا وقيمة جدًا، فالحمد لله النشاط كان متميز جدًا».
وتابع:« أنا كان يهمني جدًا الطلاب إنهم يكونوا متواجدين في المهرجان، وكل محبي السينما من جميع المجالات كانوا متواجدين بشدة، وكنا بندي جوائز لـ الأفلام القصيرة ودي أفلام بيعملوها الشباب نجحت نجاح كبير جدًا، في منهم خد جوائز يقدروا يكملوا أفلامهم لو كان فيه تعثر في الإنتاج يكمل الفليم، ودي كلها أهداف واتحقق منها نسبة كبيرة جدًا الحمد لله».
واردف:« إحنا لسة هنعمل تقييم ونشوف إيه النقاط اللي قدرنا نحققها وإيه النقاط اللي كنا ضعاف فيها، وهقدم لـ اللجان بتاعتي وكل قسم هيقيم القائمة دي وهنكمل عليها ونبني».
كما تطرق حسين فهمي، في حديثه عن الصعوبات التي واجهته في رئاسة الدورة الـ44 من مهرجان القاهرة السينمائي الدولي، حيث قال:« لو مفيش تحدي الموضوع مش هيبقى ليه طعم، لازم يبقى فيه تحدي ونعدي التحدي ده، والتحديات كانت كبيرة مفيش شك، ولكن قدرنا نتجازو معظمها وإحنا بنشتغل».