بمجرد إعلان صافرة النهاية لمباراة الأهلي والدحيل القطرى بفوز الأهلي بهدف لحسين الشحات وحسم لقاء بايرن ميونخ بطل أوروبا انهالت الكوميكسات الساخرة بين جمهور الأهلى الذى ظهر ساخرا من نفسه ، فيما شهدت صفحة بايرن ميونخ إقبالا كبيرا من جمهور النادي الأهلي وبدورها قامت الصفحة بنشر مجموعة من المنشورات مقتبسة جملة في أحد الأفلام ” لاتخافوا ولكن احذروا” ومن هنا ازدادت التعليقات الساخرة من الجمهور المصري.
قالت نورهان قنديل ” اشطا احنا بنحب كدة آخر مرة أحدهم حاول يشوف نفسه قبل الماتش وقال للأهلي اوعي تنام قفشه اداله القاضيه منامش منها لحد النهاردة”.
فيما قال إبراهيم طه “اللهم ثقل اقدامهم وشتت افكارهم وغض بصرهم عن الشناوي واجعلهم تائهين نائمين في الملعب يارب
قولوا يارب”
وعلق أحمد جمال “إحنا مبنخفش غير من ربنا وحسبي الله ونعم الوكيل في أي لاعب هيدخل فينا جول”.
وكتب علي محمد ” رسالة لبايرن ميونخ ..القوى فيه الاقوى منه و العفى فيه الاعفى من، و الظالم له يوم، و حسبى الله ونعم الوكيل فيكم ان كسبتونا اكتر من 3 ”
وكان الفنان “محمد عز” ضمن التعليقات على صفحة البايرن ميونخ إذ قال “هتروحوا من ربنا فين”
فيما سخرت آيه محمود ” خوف مابنخفش حذر مابنحذرش ولعب مش لاعبين العبوا لوحدكم بقا “.
وكتب ياسر خميس ” وعهد الله يا بايرن ما راضي أحلها معاك بالعنف علشان شاكلك قدام زمايلك ف اوروبا”.
وقال محمد طارق ” في ايه بتخوفونا أكتر مااحنا خايفين”.
وكتب سيد المهدى ” انتوا خدتوا الموضوع جد كده ليه ده احنا كنا بنهزر “.
ويلتقي النادي الاهلي بفريق بايرن ميونخ، في إطار منافسات دور نصف النهائي لبطولة كأس العالم للأندية، بعد غدًا الإثنين في تمام الثامنة مساءً بتوقيت مصر على ملعب استاد “الريان” بالدوحة.
وتخطى لاعبي الاهلي فريق الدحيل القطري في دور ربع النهائي بهدف نظيف أحرزه لاعب الوسط “حسين الشحات” في الدقيقة 30 من زمن الشوط الأول للمباراة.