علق المطرب تامر عاشور عبر حسابه على موقع التواصل الاجتماعي الفيسبوك عن أزمة صورته مع الطفلة مريضة السرطان ، و ذلك بعد حالة من الغضب شعر بها الجمهور عندما علق كاتباً على صورته معها ” أنا صايم يا فاطرة .
و كتب تامر معلقاً : صباح الخير – انا طول حياتي ومشواري عمري ما اتريقت على حد سليم علشان اتريق على مريض حاش لله – واللي اخد كلامي تريقه على مريض نفوسهم ضعيفه وهم اللي مرضى بيفرقوا بين المريض والشخص الطبيعي.
لو نزلت صورتي مع اي طفل ” اللي هو غير مُكلف بالصيام ” وقولتله ب اي طريقه
“متشربش مياه قدامي يا فاطر ” او “خد دي يا فاطر انا صايم “، حد هيتكلم ؟ مستحيل علشان طفل طبيعي
و تابع : لكن المريض لاااااا منهزرش معاه زي الطبيعي علشان هو مريض ونفضل نقوله مريض مريض مريض ونحسسه بمرضه من تعامولاتنا –
المرض الحقيقي هو التفرقه بين اطفالنا اللي بصحه جيده ربنا يديهم كل الصحه واطفالنا اللي ربنا اختارهم للمرض
المرض الحقيقي هو ان فكره ” المعايره ” جاتلك قبل ١٠٠ فكره تانيه ممكن تجيلك من جمال البنت وضحكها وبهجه الصوره
وللأسف شوفت كمان حاجه غريبه جدا
ناس كتير قوي محسوبين على “هامش هامش هامش المجال الفني ” عمرهم ما شافو مني حاجه وحشه غير اني مباديهمش مواعيد لاقيتلهم تعليقات كأنهم ما صدقوا لاقولي غلطه وانصحهم “العمر بيجري حاولو تعملو حاجه لنفسكم أولى”
البنت اللي في الصوره فضلت ف حضني طول تصوير الاعلان وبحبها جدا جدا
ومتفقين انا وهي على حاجات كتير قوي قوي هنعملها