حل الفنان نعيم عيسى ضيفاً ببرنامج «واحد من الناس»، المذاع على شاشة «الحياة»، ويقدمه الإعلامي عمرو الليثي، مؤكداً أن آخر عمل فني قام به كان مسلسل «شارع عبد العزيز» ولم يكن راضيا عن دوره، «جابوني في مشهد واحد وقولت جُمل محدودة، واتضايقت وزعلت، قولت بعد كل الأعمال اللي عملتها دي كلها في الآخر يجيبوني في مشهد واحد؟.. قولت بيني وبين نفسي والله ما أنا ممثل بعد كدة ورجعت بلدي إسكندرية تاني، قاعد في البيت زعلان».
نعيم عيسى: بتضايق لما تيجي مناسبات فنية ولا يتم ذكري أو تكريمي
وتابع الفنان نعيم عيسى: «أنا بتضايق أوي لما تيجي مناسبات فنية أو مهرجان والحاجات دي ولا يتم ذكري أو تكريمي أو حتي حد يبعتلي دعوة، ولكن هعمل إيه، بشوف وبتفرج في التلفزيون بيكرموا ناس كتير ولا حد فكر يكرمني.. كنت بحب الفن من صغري ومن وأنا عندي 6 سنوات».
أشرف زكي الوحيد اللي بيسأل عليا
وأكد أن الدكتور أشرف زكي، نقيب المهن التمثيلية، هو الشخص الوحيد الذي كان يسانده في فترة مرضه ويطمنئن على حالته الصحية بشكل مستمر، «محدش من الفنانين ولا الممثلين زارني ولا سأل عليا، مفيش إلا أشرف زكي وقف جنبي ويسأل عليا ويعالجني ويعملي عمليات».
من هو نعيم عيسى
يذكر أن نعيم عيسى، من مواليد يناير عام 1937، والتحق بفرقة مدبولي وفرقة الإسكندرية في بداية حياته الفنية، ليشارك بعدها في العديد من المسرحيات منها (الزمبليطة في الصالون، ناس كده وكده، ريا وسكينة، الواد سيد الشغال)، ثم انتقل للعمل في السينما والتلفزيون، ومن أبرز أعماله (المتسول، مين فينا الحرامي، الباشا تلميذ).