كشف الفنان حاتم صلاح عن مشاركته في مسلسل الكبير أوي 8 برمضان 2024، وعن كواليس مشاركته في مسلسله الجديد على باب العمارة.
أعلن حاتم صلاح عن مشاركته في مسلسل الكبير أوي 8 المقرر عرضه في الماراثون الرمضاني 2024، وقال: “إن شاء الله في الكبير أوي الجزء الثامن، هي معلومة ناس كتير مش عارفاها لسه، ومش عارف صح ولا غلط إني قولت لكن هتشوفوا نفادي إن شاء الله”.
وتابع: “النجم الكبير أحمد مكي هو آه بطل الكبير أوي لكن في مشاهد كتير ممكن ميكونش هو البطل فيها وأنا بالنسبة لي أنا قعدت مع الناس دي بقالي سنتين وطبيعي أني ممكن أدخل تجربة بطولة على باب العمارة”.
وأما عن كيفية ترشحه لـ دور البطولة في مسلسل على باب العمارة، قال: “كلمني أستاذ خيري سالم إنتاج دكتور بيتا وأنا مكنتش محضر أن أعمل دور رئيسي دلوقتي بس مكنتش قلقان منها برضو لأن الورق والمخرج كويسين بعتبره ده دور عادي زي أي دور أنا بقدمه، وأنا بعتبر أن دوري في الكبير أوي من أدوار البطولة ومعايا كوميديانات مصر كلهم وهو شخصية بلعبها وبحاول أكون موجود وسط الجروب”.
وعن شخصية عوض في مسلسل على باب العمارة قال حاتم صلاح: “أنا قرأت الورق بعد ما كلمني أستاذ خيري ولسه مش عارف أنا هعمل إيه لمدة 3 ساعات كان مكتوب منه 5 حلقات، بس مصطفى حمدي عظيم وبحب شغله لأن أنا اشتغلت معه في شلبي وبيعمل مواقف في الكوميدي حلوة والكوميديا بتبقى أسهل، وبعد 5 ساعات كلمت أستاذ خيري وقولت له أنا موافق وعايز ألعب الشخصية دي”.
وأضاف: “واللي كان مخوفني أن عوض شخصية صعيدي زي نفادي وعايز أعمل حاجة بعيدة ومختلفة وشخصية تانية ومتقربش فيها لشخصية نجحت مكنتش عايز أستغل نجاح معين، واشتغلت مع محمد خليفة مدير أعمالي وقرأنا المسلسل كتير أوي وبعدين اشتغلت مع عبدالنبي الهوراي كان مصحح اللهجة وفي نفس الوقت رجل صعيدي أصيل”.
مسلسل على باب العمارة
يشارك في بطولة المسلسل عدد كبير من نجوم الفن، حاتم صلاح، ومحمد رضوان، وآية سماحة، ومحمد محمود، ومحمد عبدالعظيم، وعزة لبيب، وريهام الشنواني، وأمير عبدالواحد، وبوسي الشامي، والتي تدور أحداثه في أطار كوميدي.