حرصت الفنانة حورية فرغلي على توجيه رسالة شكر لـ جمهورها وزملائها، في أول ظهور لها على قنوات art، وذلك بعد عودتها إلى مصر لـ تكشف للجمهور تطور حالتها الصحية بعد خضوعها لـ عملية استئصال الرحم منذ الأيام الماضية .
ووجهت حورية فرغلي الشكر لـ كل من سألوا عليها في فترة مرضها، حيث قالت: أحب أطمنكم أنا رجعت من المستشفى ورجعت البيت وبقيت كويسة الحمدلله وشكرا لكل اللي سألوا عليا، شكرا لـ نجوم الزمن الجميل،صفاء أبو السعود كان نفسي أكون ضيفة في حلقاتك وصفية العمري وأشرف زكي وإلهام شاهين ومحمد رمضان ناس كتير أوي سألت عليه.
وأضافت: أنا اتولدت برة وعيشت برة فطول عمري كنت محتاجة للحنان والحنية وده حسيته أخر أسبوع اما جالي ورم في الرحم، وأنا مش هيبقى عندي اي أطفال خلاص بس ولاد اخواتي هما هما ولادي وأي طفل هشوفه هعتبره ابني.
وواصلت: عايزة أقولكم تليفوني مبطلش رن من ناس معرفهاش، وكمية الدعاء والحب مخلتنيش مصدقة نفسي وده حصل في الغريب مش من القريب، ولقيت 40 نفر دخلوا عليا من اللي ساكنين في العماير اللي حوليا بالشيكولاتة وغيره، الحاجات دي خلتني عايزة أقف على رجلي وهرجع أعمل أعمال تاني أحلى من الاول مش هتسمعوا عني أي حاجة وحشة تاني خالص.
وتابعت حورية فرغلي: أنا عارفه إني في آخر سنتين كنت مختفية؛ وده كان بسبب المشاكل اللي كانت عندي ومش هتسمعوا عني عمليات ولا حوادث وهحاول على قد ما أقدر وهحاول اختار الحاجات اللي بتحبوها زي حكايات بنات وساحرة الجنوب، الشغل مش كتير أوي اليومين دول وده رزق في الآخر وربنا يبعت، فيه عملين بحضرلهم مع أستاذ خالد الحجر وأستاذ أكرم فريد.
واختتمت حورية فرغلي حديثها، قائلة: بقول شكرًا لكل حد دعالي وكل حد جالي وجابلي ورد مش عارفه أقولكم شكرًا قد إيه وفخورة إني مصرية؛ لأن ميتهيأليش إن فيه بلد تانية عملت كده مع فنانة مرت بظروف صعبة والبلد كلها وقفت معايا من سوهاج والأقصر.
حورية فرغلي وعملية استئصال رحم
وكانت قد خضعت حورية لـ عملية جراحية في الرحم ، وذلك يوم الخميس الموافق 6 من شهر يوليو الجاري، وأشارت حورية فرغلي أن عملية استئصال الرحم الذي خضعت لها تعد عودة جديدة لها، قائلة: أنا اتولدت من جديد، وحالتي تتحسن مع الوقت وسأعود لجمهوري قريبا.