كشف الفنان إدوارد، تفاصيل معاناته في أول يوم إصابته بفيروس كورونا، مشيرًا إلى حالة اليأس التي انتابته بسبب الفيروس، والتفكير في الاموات.
وكتب الفنان عبر حسابه الرسمي بموقع التواصل الاجتماعي “فيسبوك”: “هحكيلكوا علي أول ليلة مع الكورونا بما أنها أول مرة تجيلي وطلعت منها بإيه، ليلة صعبة جدا تعب في الجسم زى ما يكون حد بيعذبك وبيدوس علي كل حته في جسمك وصداع نفسك يغمي عليك عشان تخلص منه ورعشه فظيعة، طول الليل بقول يارب”.
وأضاف: “مش هنكر في لحظة فكرت في الموت والناس اللي ماتت من الكورونا، صدقوني ماخوفتش من الموت خوفت علي مراتي وولادي وعيلتي، وإنهم مسئولين مني ولازم أبقي موجود عشانهم ولازم أصلي لربنا عشان يقومني أكمل وحسيت إني فقدت شغف كل متع الحياة”.
واستطرد: “مش عاوز حاجة، عاوز أكون كويس عشانهم، بس أنا من النوع اللي بحب الناس وبحب الحياة وبحب الأصحاب، انبسط كتير أوي لما لقيت ناس كتير سألوا عليا أعرفهم وماعرفهمش وعاوزين يساعدوني في محنتي بأي شكل، ومنهم فنانين كبار بجد وإعلاميين كبار بجد، ربنا يباركلكم في صحتكم وعيلتكم”.
وأردف: “كمان اكتشفت قد إيه مراتي أنا غالي عندها موش همها كورونا ولا موش كورونا، قاعدة جنبي تعملي كل حاجة تريحيني قد إيه أنتي ست عظيمة جالك كورونا ومقولتليش السنة اللي فاتت عشان كنت بشتغل وموش عاوزة تشغليني بيكي، مكنتش عارف إنها صعبة للدرجة دى، بجد انتي جبل إنكً استحملتي وكنتى واقفة كمان تخدمينا وتشوفي طلباتنا”.
وتابع: “أنا اسف إني محستش بيكي في الوقت ده، أوعدك أقوم وأعوضك عن كل ده، الحياة موش مستاهلة غير إنك تعيش مع ناس بتحبها وتحبك وتخاف عليك، دي الخلاصة إني فقدت الشغف في متع الحياة عاوز أعيش مستور أنا وعيلتي ويكون حواليا ناس بحبها وبتحبني ونتمني لبعض الخير وبس في ليلة واحدة الدنيا علمتني كتير ربنا يبعد عنكم اي حاجه وحشه”.
تطورات الحالة الصحية للفنان إدوارد
من جانبه، أعلن الفنان إدوارد عبر حسابه الرسمي على موقع التواصل الاجتماعي “فيسبوك”، عن إصابته بفيروس كورونا، معلقًا: “إيجابية”.
وتعاقد الفنان على بطولة عمل درامي جديد، يحمل اسم قلب واحد، للمخرج حسن البلاسي، ويشاركه البطولة الفنان هاني سلامة، ومن المقرر عرضه في الماراثون الرمضاني المقبل 2022.
أخر أعمال إدوارد
ومن جهة أخرى، شارك إدوارد في مسلسل كوفيد 25 ضمن السباق الرمضاني الماضي 2021 ، و هو بطولة يوسف الشريف، وأحمد صلاح حسني، وآيتن عامر، وإيناس كامل، وراندا البحيري، وميدو عادل، وأمير صلاح الدين، وميرنا نور الدين، وديانا هشام، وإسلام جمال، وزكي فطين عبد الوهاب، وعماد رشاد وغيرهم من النجوم، ومن تأليف إنجي علاء وإخراج أحمد نادر جلال.
كما انضم لفريق تمثيل مسلسل نسل الاغراب و هومن بطولة كل من أحمد السقا، أمير كرارة، مي عمر، فردوس عبد الحميد، دياب، نجلاء بدر، أحمد مالك، أحمد داش، منة فضالي، محمد مهران، محمد جمعة، ريم سامي، ملك أحمد زاهر، هدير عبدالناصر، سلوى عثمان، أحمد فهيم، عماد زيادة، إنعام الجريتلي، حمدي هيكل، أحمد ماجد، مروة الأزلى، وتأليف وإخراج محمد سامى.