كشف الفنان شريف خير الله تفاصيل كثيرة لمواقف إنسانية مر بها وأثرت فيه بشكل كبير، وقال إنه تعرض لحادث سيارة صعب من عدة سنوات مضيفا: علاجي استغرق شهور.. واختفيت عن الأنظار لدرجة كتابة أخبار على المواقع والصحف بأني تُوفيت وكانت السويشيال ميديا بتترحم عليا لدرجة إن أحد الأصدقاء شافني صدفة اتخض إني لسة عايش.
وتحدث خير الله خلال حواره بـ برنامج كلم ربنا.. مع أحمد الخطيب على الراديو 9090، تفاصيل أزمة مرض والده التي أثرت على عمله، وقال: تركت الشغل ومكنش عندي اللي أصرف بيه على أولادي وبنام بليل وانا بعيط بالدموع لكن كان عندي ثقة تامة إن ربنا مش هيسيبني.. وكنت بكلمه أقوله انت الرزاق.. خليك جنبي.. فك لي ضيفتي.. وفجأة وصلني اتصال من جهة عمل عشان اتعاقد على مسلسل كبير جدا وعمل فني مهم هو الاختيار.. مكنتش مصدق نفسي.. وقعدت أقول الحمد لله وسجدت لربنا سجدة شكر.. وأدركت بالفعل إن ربنا جنبي وكان سامعني.
وأعرب الفنان شريف خير الله ببرنامج كلم ربنا قائلا: برنامج كلم ربنا فكرة مهمة للناس علشان يتعرفوا على تجارب بعض ويشوفوا أد إيه ربنا بيقف مع الناس ويسترها معاهم وينجيهم.