تحدث عصام الحضري مدرب حراس مرمى منتخب مصر، عن آخر استعدادت الفراعنة لبطولة الأمم الإفريقية، التي تنطلق في الكاميرون بداية من 9 يناير الجاري وتستمر حتى 6 فبراير.
وأكد الحضري، على أن المنتخب يستعد مثل باقي المنتخبات، كما أشار إلى هدف المنتخب في هذه البطولة وهو الوصول لأبعد نقطة فيها.
تصريحات عصام الحضري
وقال الحضري عبر فيديو نشره الاتحاد المصري لكرة القدم عبر صفحته الخاصة بموقع التواصل الاجتماعي “فيس بوك” ” عندنا هدف وهو الوصول لأبعد نقطة في البطولة، وأتمنى إن ربنا يكرمنا في البطولة، كل اللاعيبة اللي معانا مركزة، ولكهم بيتمرنوا، وبيكون عندنا تمرين على فترتين، وشغالين كويس الحمدلله”.
وعن ضربة البداية أمام منتخب نيجيريا، قال مدرب حراس الفراعنة ” أكيد مباراة صعبة، ومفيش في إفريقيا دلوقتي حاجة اسمهما منتخب ضعيف،وبنحترم كل المنتخبات، وطبعاً قدامنا ماتش مهم مع نيجيريا، وبنفكر فيه بشدة”.
وأكد ” قولت قبل كده اللي بينافس على بطولة أو عايز يوصل كأس عالم، مبيفكرش هو بيقابل مين، بيحط هدفه وأنه عايز يكسب، وبناخدها ماتش ماتش”.
وأضاف ” اللاعيبة هنا كلها مركزة، وعندها إصرار وطموح، هنشتغل وهنجتهد وإن شاء الله توفيق ربنا يكون معانا، لأن مش هينقصنا غير توفيق ربنا”.
وواصل تصريحاته مؤكداً على مدى تعب اللاعبين في التمرين الذين يُعقد على فترتين خلال اليوم الواحد.
وعن تدريبه للحارس بشكل خاص، قال الحضري ” لو هتكلم عن الحراس اللي معايا، فهما بيتعبوا جداً وبيجتهدوا ، الأربع حراس بيتمرنوا بقوة، وداخل كل واحد من الأربعة اللي معايا حلم وهو تمثيل المنتخب في البطولة الإفريقية،”.
واستطرد قائلاً “أنا كحضري، الأربع حراس بالنسبة لي هما كلهم رقم واحد، طول ما هما بينضموا للمنتخب فهما رقم واحد في مصر، أما بقى حكاية مين يلعب ومين لا دي خاصة بوجهة نظر الجهاز الفني ككل، والأربعة جاهزين وبنشتغل وبنتعب عشان البطولة بطبعها صعبة”.
وأتم ” هنشتغل وهنجتهد وهنتمرن لأن هدفنا وهدف كل اللاعيبة هو حصد البطولة القارية، اللي المنتخب واخدها 7 مرات، وأنا واخدها 4 مرات، وطول ما هدفك هو البطولة يبقى هتاخدها”.