ابدى أحد عملاء احدى الشركات من سءو وتردي المنتج الخاص بوكيلهم، مؤكدا انه عثر على عيوب في لابتوب قام بشراءه من الشركة خلال الفترة الماضي,
وينشر أوان مصر شكوى العميل دون تدخل في حين يتيح الموقع حق الرد للشركة في أي وقت على شكوى العميل.
وفيما يلي نص الشكوى:
«جاي احذر من شركة اسمها اوفرلك Awfarlak… جايب من عندهم لابتوب استيراد بضمان من بره و مفروض انها شركة كبيرة. لقيت فيه ان الشاحن و الجهاز بيسخن اوي اثناء الشحن, و البروسيسور بتوصل حرارته ل100 درجة. بكلمهم عشان اقولهم عالعيب و اوريهم الجهاز, من اولها بيطلعوا باعذار و يقولولي ممكن يكون عيب استخدام, و ده حرفيا في تاني يوم بعد مجبته.
روحتلهم فرعهم الاساسي اللي فيه الصيانة فالمقطم, بحكيلهم عالمشكلة من قبل مكمل كلام اساسا كل المهندسين اللي هناك كل همهم يجيبوا العيب عليا او يقنعوني ان مفيش مشكلة اساسا, و معروف ان البروسيسور لما يوصل لحرارتة ل100 اللي هي اعلي درجة من غير اي حمل عالجهاز غير الشحن فكده يعتبر الجهاز بيسيح و اي واحد مبيفهمش فالكمبيوتر يقدر يفهم كده., فالاخر قالولي اسيب الجهاز معاهم يومين. لما لقيت طريقة الكلام معاهم كده خوفت منهم و انا اساسا جايب الجهاز مفاتش عليه يوم و هما مش راضيين عالاقل يكشفوا عليه قدامي. جه فالاخر مدير هناك قالي مش حنقدر نصلح جهازك, لترجعه لتاخد فلوسك, بكل برود كده. و هو اساسا ميعرفش اي حاجة عن المشكلة و لا المهندسين بتوعه, كانه بيقولي اعلي ما في خيلك اركبه, و مش عاجبك كلم حماية المستهلك. و الجهاز انا حاجزه من قبليها بشهر قبل التعويم كان سعرة ارخص من ساعتها باكتر من 3000 جنيه.
شكوى ضد اوفرلك Awfarlak
«فلو رجعتهت او استبدلته حخسر الفلوس ديه و هما عارفين كده. قولتله انا ليا ضمان شاريه بفلوسي و اللي بتعمله ده اسمه اكل حقي و فلوسي اللي انا دافعها فالضمان. بعد كده عرفت ان المدير اللي قالي الكلمتين دول هو الBrand Manager اللي هو زي مدير الشركة نفسها, تخيل لما الكلام ده يجي من المدير نفسه و بكل صراحة كده.
روحت لحماية المستهلك قالولي حنكلمهم عشان نحل الحكاية معاهم, قالولي مفيش حل غير انك ترجعه او تستبدله, قولتلهم علي موضوع زيادة سعر الجهاز قالوا حيحاولا تاني يتفاوضوا معاهم بس فالاخر قالولي مفيش فايدة و انا ميقدروش يجبروهم يصلحوا الجهاز يقدروا بس يرجعوه او يستبدلوه منهم, من غير اي علاقة بسعر الجهاز اللي غلي. و هو اكيد المدير ده كان عارف كده لما قالي اروح لحماية المستهلك. عرفت اوصل للناس نفسها اللي ماسكين الشركة اللي بتوردلهم الاجهزة من بره, هما عاملين شركة مختلفة باسم مختلف اسمه Alharez ليها فاتورة لوحدها هي اللي بتورد, تقريبا بسبب الضرايب. فكلمنا المدير اللي ماسك الشركة دي فالاول قالنا ازاي يحصل كده و اكيد حنصلحلك الجهاز دحنا كمان حنديلك ضمان سنتين و كلام من النوع ده, فالاخر وعدنا انه يستبدله بجهاز زيه تاني جاي من بره. كل شوية نساله الجهاز جاي امتي يقول الاسبوع الجاي, يعني تسويف و خلاص, لغاية مفترة الضمان قربت تخلص. فالاخر قالنا ملقناش الجهاز ده من بره و ممكن تستبدله باي جهاز تاني, ده بعد مالجهاز سعره غلي باكتر من 6000 جنيه, و ده مش اي كلام ده من اسعار موقعهم هما. بعد كده اشتغل فشغل التجاهل و انه ميردش عالمكالمات.
دلوقتي الجهاز قاعد معايا مش عارف اعمل فيه ايه, حاسس انه بيبوظ مني شوية بشوية و بيهنج اكتر كل فترة من السخونية. دورت عالمشكلة بتاعته كتير عالنت لقيت ان غالبا البطارية اللي فيه منتفخة و عاوزة تتغير. و فعلا لقيت فيه فرق ما بين شاسيه الجهاز من قدام عند التاتش باد جاي من الانتفاخ ده زي اللي في الصورة هنا, و لو كمل حيبوظ باقي الشاسيه كله. و لسه قريب مفصل الشاشة بتاعة الجهاز بقي مرخي اوي, عكس بجه فالاول خالص لما كان المفصل جامد اوي بحيث متقدرش تفتح الشاشة بصباع واحد زي باقي اللابتوبات و كنت فاكر ان ده ميزة ليه, اكتشفت دلوقتي ان هم كانوا رابطين علي المفصل جامد اوي بحيث يبان انه صعب يتحرك في الاول, بس مع الومن بيرخي و يبوظ تاني. يعني اكتر من عيب هما عارفين انها موجودة فالجهاز و مجرد مخبينها عن الناس.
طبعا اشتكيتهم في ريفيو علي صفحتهم عالفيس محدش منهم انكر اللي حصل في ردهم. كان عذرهم بس ان هما رفضوا الضمان عشان كنت بتخانق معاهم علي لابتوب بايظ مكملش يوم و مديرهم اللي مزاجه خلاه ياكل حقي فالضمان, و عملولي بان من الصفحة. بعد فترة لقيت كذا حد شاف الريفيو بتاعي و راسلني علي اساس نفس المشكلة حصلت معاهم. طلعوا بيعملوا كده في كل الاجهزة الاستيراد ( و الله اعلم في باقي الاجهزة عندهم ) بيصلحوا العيوب للاجهزة البايظة اللي جاية من بره تصليح مؤقت علي اساس يعدي فترة الضمان و لو اي عيب ظهر فالفترة دي بيطلعوا باي عذر عشان ميتكلفوش فالتصليح. يعني مش بيسلبوك حقك في الضمان اللي انت شاريه بفلوسك بس, لا ده كمان فالجهاز نفسه اللي بيظهروه بحالة كويسة و مزيفة لما تيجي تشتريه.
و نشر العميل صور محادثته مع مدير الصيانة لدى الشركة, و صورة الجزء المفتوح من شاسيه الجهاز, و فاتورة شركة الاستيراد عندهم.»
ويؤكد موقع اوان مصر استعداده لنشر أي رد من الشركة على العميل في أي وقت .