صرحت الفنانة إلهام شاهين، بأنها كانت تفكر في اعتزال الفن بعد مشاركتها في فيلم “يوم للستات”.
وقالت إلهام خلال ندوتها بمهرجان جمعية الفيلم: “فكرت في اعتزال الفن، بعد فيلم يوم للستات، لأنه عتبر الفيلم الـ 100 في تاريخي الفن”.
وتابعت: “وكنت شايفة أنه بعد فيلم يوم للستات، مش هلاقي حاجة تستفزني اعملها، لأني يعتبر قدمت كافة الشخصيات، وكنت وقتها مبخفش من التحديات، ومكنش فيه شخصية جديدة معملتهاش”.
واختتمت: “ولما اتعرض عليا فيلم حظر تجول السيناريو شدني، وقررت اقبل الفيلم، وكنت في أول يوم تصوير متوترة وقلقانة من شخصية فاتن، وبعتبرها أسوأ ليلة، لأني قعدت أفكر كتير”.
إلهام شاهين: المخرج أمير رمسيس خبيث وكان سبب خلافي مع أمينة خليل
وقالت “شاهين” خلال ندوتها في مهرجان جمعية الفيلم: “أمير رمسيس عمل حاجة خبيثة أوى، قبل تصوير الفيلم، سنة ونص اختار فريق العمل، واختار أمينة خليل تلعب دور بنتي، وانا مقابلتهاش ولا مرة ومكنش بيني وبينها معرفة”.
وأردفت: “ولما بدأنا تحضيرات الفيلم والبروفات، أمينة محضرتش معانا ولا مرة، فسألته عنها، وقولتلو مش هتعمل معانا تحضيرات للفيلم، وكل مرة يخترعلي حجة شكل، مرة مسافرة، ومرة تانية بتشتغل، ومرة تالتة يقولي نسيت”.
أضافت إلهام شاهين: “بدأت اضايق وازهق لأنها المفروض تعمل بروفات، ولكن بعد كده عرفت انه قاصد يعمل كدة علشان المفروض ان من 20 سنة مشوفتهاش في الفيلم ولسه بتعرف عليها ومش اصحاب ولا حبايب، فحقيقي مشوفتش مخرجين خبثة كدة”.
واستطردت: “أنا بحب شخصية فاتن أوي من فيلم حظر تجول والحقيقة إن الجمال ده يرجع لأستاذ أمير رمسيس لكتابته الجميلة العذبة، ومسألة الأمومة شيء مؤثر جدا بالنسبة لي والأمومة عندي شيء مقدس في مرتبة بعد ربنا”.
وتابعت: “شخصية فاتن عاشت معايا كتير بعد ما الفيلم انتهى، قعدنا في تصويره من سنة لسنتين لأننا عايزين نعمل فن بجد ولا فكرنا في إننا هنكسب قد إيه”.