علق الفنان الكوميدي إسلام إبراهيم عن ما يخص الشابين أصحاب الصوت الرائع ولكنهم يعملان بـ «النقاشين» وهو رفض والدهما العمل داخل الوسط الفني.
وكتب عبر حسابه الخاص بموقع التواصل الاجتماعي «فيسبوك»: «أنا عارف ان الكلام اللي هقوله ده ممكن ميعجبش ناس كتير بس انا شايف الترند ده من زاوية تانية خالص».
وأضاف: «فكرة انك ربنا يرزقك بشابين زي دول ينطبق عليهم كلمة شباب زي الورد لانهم ربنا كارمهم بالوسامة والموهبة والصوت الحلو وعندهم المؤهلات انهم يكونوا نجوم ومتحاولش تساعدهم انهم يحققوا حلمهم او يعملوا الحاجة اللي بيحبوها وتفرض عليهم قيود ومسؤليات مش بتاعتهم زي ان هما يجهزوا اخواتهم البنات اللي اكبر منهم حضرتك البنات دول انت اللي خلفتهم مش هما والحياة دي حياتك انت مش حياتهم هما وتفرض عليهم يكونوا نقاشين وده مش تقليلا من مهنة النقاش اكيد هي مهنة محترمة وشريفة لكن اي حد مش موهوب يقدر يشتغلها لكن مش اي حد عنده الموهبة والصوت ده».
مستكمل حديثه: «خلاصة الكلام احنا مش بنخلف العيال عشان نستعبدهم احنا عندنا مفاهيم مغلوطة كتير في فلسفة الجواز والخلفة والتربية وزي ما طاعة الوالدين واجبة واي ابن بيفتح بقه او يعترض علي حاجة مش عجباه بيبقي ابن عاق كمان الولاد امانة هتتسأل عليها قدام ربنا».