يثبت الشعب المصري دائما رقيه وأمانته، ففي واقعة ليست بجديدة على أخلاقيات المصريين، أعاد شاب مصري حقيبة بها عملات مختلفة بحوالي 2 مليون جنيه لسوري بالكويت.
لقيت شنطه على الرصيف
قال الشاب المصري: “كنت نازل اشتري بعض الأغراض، ولقيت الشنطة على الرصيف مرمية، مسكت الشنطة، ولقيت الحبل بتاع الشنطة مقطوع، تقريبا وقعت منه وماحستش بيها”.
أي فون ويورو
وأضاف الشاب: “فتحت الشنطة ولقيت فيها أي فون، ولقيت فلوس بعملة اليورو، وكانت كتير ماعدتهاش، وكان فيه دينارات وريالات، وروحت محل تليفونات لواحد قريبي جنبي في الصيدلية (انا شغال كاشير هنا) وطلبت من صاحب المحل اننا نفتح التليفون، علشان نشوف أي رقم فيه”.
تليفون من صاحب الشنطة
وأوضح: “واحنا بنتناقش إزاي نفتحه، رن صاحب الشنطة، وكلمته وقالى غربتي وشقايا وكل ما املك في الشنطة اللى معاك دي، قلت له كل اللى في الشنطة موجود وفي رقبتي، ماتقلقشي من أي شي، والمبلغ اللي كان في الشنطه يوازي 2 مليون جنيه مصري تقريبا – فلوس كتير وده شقاه”.
خريج دراسات إسلامية
وأوضح، ان صاحب الشنطة طلب اللوكيشن اللي أنا فيه وبعتهوله، وأقل من خمس دقائق، وصل هو وأهله بالسيارة، واتشكر وباس راسي، ولم يكن يتوقع أبدا إن الفلوس دي ترجع تاني، قلت ليه إحنا صعايدة وولاد ناس ومتربيين، ومانقبلشي على نفسنا أي حاجه حرام، وأنا خريج دراسات إسلامية جامعة الأزهر، وماينفعشي أقبل على نفسي ولا على أهلي حاجه حرام، احنا الحمد لله عايشين في الحلال، ودي تربية أبونا لينا كلنا أنا وأخواتي.
مايحدت من المصريين مجرد حالات فردية
وأكد الشاب المصري إن الحالات اللى بتحصل جوه الكويت من أي حد مصري، مجرد حالات فردية، ولا تمثلنا في شيء، لكن إحنا بطبيعتنا شعب مسالم ومحترم، وفي أي مكان باحترامنا وبأدبنا وبتربيتنا وبأصولنا اللى اتربينا عليها، خاصة ان شعب الكويت شعب راقي ومحترم، وبيعاملنا بكل أدب واحترام، والحالات الفردية دة بتستفزنا أكثر من صاحب البلد نفسه.
#خاص_ترند | شاب مصري يعيد حقيبة لسوري بها مبلغ مالي كبير “يورو – دينار- ريال سعودي” pic.twitter.com/25OrqIq6rm
— ترند (@Trendntwork_kw) April 30, 2024