تحدث الفنان أحمد السقا عن تفاصيل مشاركته في مسلسل حرب مع الفنان محمد فراج والمخرج نادر جلال، الذي يخوض من خلاله منافسة دراما رمضان 2023.
وقال أحمد السقا خلال لقائه مع الإعلامية فاطمة مصطفى في برنامج الراديو بيضحك: مكنش فعلًا عندي حاجة في الدراما الرمضانية السنة دي، وقبل شهر رمضان بأيام معدودة لقيت الراجل بتاعي محمد حسن مدير أعمالي بيكلمني بيقولي عايزك ضروري.
وأضاف: في العادي بتاعي لما بيبقى عندي يوم أجازة مش بحب اتكلم في شغل، بروح أتمرن وأركب خيل ومبعملش حاجة تاني.. ولقيته بيقولي عندي مصيبة في البيت ومش هينفع في التليفون.
وتابع أحمد السقا: روحتله على البيت وقالي كنت قاعد مع فلان وفلان كلموني عشان هنعمل مسلسل في رمضان وهنبدأ تصوير يوم التلات الجاي قولتله أنت بتهزر قالي لا.. فطلبت أقعد مع أستاذ أحمد نادر جلال والمؤلف هاني سرحان تاني يوم الصبح على الأقل يحكولي.
وأكمل: وقولت يا واد أنت لو خدت الريسك ده هيبقى حاجة من اتنين يا هتلبس في حيطه ياما هتبقى كنست تاريخك كله ويبقى نقطة ومن أول السطر.. وكانت مغامرة تستحق الريسك.. وبعدين وافقت.. ولكن قولتلهم مش هنصور التلات هنصور السبت.. عشان أكون لحقت أقرأ وأذاكر.