أشاد فنان المهرجانات المعروف عمر كمال بالفنان تامر حسني وبأخلاقه ، موضحا ان له افضال عليه ، وكان سببا في تقديمه للجمهور في احدى الحفلات المقامة في قرية سياحية.
و أضاف عمر كمال في بوست نشره عبر صفحته على فيس بوك أن الفنان تامر حسني جبر بخاطره وسمح له بالغناء بجواره وقدمه للجمهور وقتها ، مشيرا بالقول: تامر حسني دا انسان قبل ما يكون فنان ، وله موقف اخر سأنشره في وقتها.
وفيما يلي نص البوست الذي كتبه فنان المهرجانات عمر كمال والذي اشاد به بالفنان تامر حسني:
” من حوالى 4 سنين كان عندى حفلة ف العين السخنة في قرية سياحية كان في نفس اليوم الفنان تامر حسنى عامل حفلة فيها .. والقرية بلغتنى ان فقرتى قبل تامر وهطلع اعمل الفقرة على نفس المسرح .. قولتلهم استحالة ده يحصل لان المنظم مش هيرضي عشان انا مش نجم ومش معروف ومحدش هيرضي يدينى الفرصة ديه .. قالولى احنا اصحاب الحفلة والقرار .. قولتلهم يعنى اعمل دعاية وانا مطمن قالولى اعمل وانا من جوايا متأكد وعارف ان محدش هيطلعنى ع المسرح ده .. عملت دعاية وناس كتير من بلدى السويس قطعت تكت عشانى وطلعت كام ميكروباص صحابى عشان يشجعونى وعملت كل اللى اقدر عليه .. روحت يوم الحفلة لقيت الحفلة الساعة ٤ العصر على حمام السباحة ومفيش ولا مخلوق اصلا والدنيا حر جدا وحفلة تامر الساعة 11 بليل ف مكان تانى خالص من القرية .. حتى مغنتش من كتر ما كان مفيش ولا فرد الناس كلها نايمة لاما محدش جه عشان لسه بدرى ع حفلة تامر .. بقى شكلى وحش جدا قدام الناس هطلع كداب وعملت دعاية بالكدب وانا مليش ذنب .. كلمت طوب الارض عشان اوصل لتامر وقتها معرفتش محدش خدمنى ومحدش رضى يساعدنى .
كنت انا وصحبى اسمه محمد سمير كان مؤمن بيا جدا .. روحت مكان حفلة تامر قعدت تحت المسرح من الساعة ٤ لحد الساعة ١١ قسما بالله حوالى 6 او 7 ساعات عشان اضمن ابقى جمب المسرح لانى لو روحت بليل محدش هيرضي يدخلنى وانا قسما بالله ما معايا حتى حق دخول الحفلة وكان قابض من القرية 600 ج !! قعدت تحت المسرح بحيث اقدر اكلم اى حد واطلعله اغنى معاه حتى عشان منظرى قدام الناس يبقى حلو .. 7 ساعات لحد ما النهار راح والليل جه و الحفلة اشتغلت وطلعت طبعا .. كان جمب المسرح جاردات ومنظمين و كله ملخوم ف الحفلة وتامر .. كلمت منظم الحفلة مرضيش يطلعنى وقالى استنى للاخر .. كلمت اصحاب الحفلة محدش طلعنى .. اتصلت بكل فنان ممكن يكون يعرف تامر محدش ساعدنى .. شكلى كان هيبقى وحش جدا قدام الناس انى مغنتش وابن بلدهم محدش حتى شافه عدى من قدام المسرح .. كلمت شخص محترم جدا اسمه حازم شغال مع تامر حسنى وحكيتله .. الراجل راح قال تامر .. راح قاله هاتهولى بسرعة .. وجبر بخاطرى وقدمنى للناس وغنيت جمبه واتصورت .. وروحت رفعت الصور انى كنت ف الحفلة وغنيت .. يمكن هو مش فاكر الموقف ده حتى بس انا فاكرهوله ان كان انسان قبل ما يكون فنان وروحت طاير من الفرحة ونمت ف بيتى مبسوط وليه موقف تانى هحكيه ف وقت تانى.
400 مليون مشاهدة لأغنية بنت الجيران
واحتفل المطرب عمر كمال ،بوصول مشاهدات مهرجان “بنت الجيران” إلى 400 مليون مشاهدة.
ونشر كمال عبر حسابه على Instagram صورته مع حسن شاكوش، وكتب: “بنت الجيران 400 مليون مشاهدة في 6 شهور فقط أول مهرجان يوصل لعدد المشاهدات ده”.