تحدثت الفنانة يسرا، عن علاقتها الكبيرة التي جمعتها مع كل من الفنان سمير غانم، والفنانة دلال عبد العزيز، وسبب ذهابها إلى فرح في نفس يوم وفاة سمير غانم، وذلك خلال لقائها في برنامج أنا والقناع، الذي تقدمه الإعلامية منى عبد الوهاب عبر شاشة قناة الحياة.
وقالت يسرا: أي حد حزنت عليه حزنت عليه من قلبي، وأي حد فرحتله فرحتله من قلبي، وما فيش حد حزنت عليه أكتر من أمي، وكل يوم عندنا فرح وميتم ولا نستطيع أن أرضى العالم، مش يمكن أكون رحت الفرح رحت علشان أنسى الحزن، طلعت من جنازة سمير غانم وكنت بكلم دلال ومش قايلالها إني أنا في جنازته؟ الناس مش فاهمة وفي ناس نفسها تشوفلك الغلط، وعلى طول كنت بسأل عن دلال عبد العزيز، وعندي الجروب بتاعها لحد دلوقتي، وأنا قولت لدلال أنا خارجة ورايحة فرح دلوقتي، ورايحه الجونة وخبيت عليها علشان أنا خايفة عليها.
وأضافت: اتعلمت حاجة من الدنيا.. وهي عمرك ما هترضي العالم سواء قمتي بواجبك، أو مقمتيش بواجبك، يمكن لما روحت الفرح كان علشان أنسى الحزن العريس والعروسة زي ولادي، وعلاقتي بالعيلتين سواء في الفرح أو الجنازة مهمة، وسمير غانم حبيب قلبي، مفيش شك إني بحبه، وكنت طالعة من جنازته وبكلم دلال عبد العزيز، وعلى طول كنت بسأل عليها، وقلت لها رايحة فرح، لكن الناس نفسها تشوفلك الغلط.
وتابعت يسرا حديثها عن والدتها الراحلة، حيث قالت: الحمد لله إنى ما خليتش حد يخدم والدتي في ظروف مرضها، والحمد لله إن ربنا أعطاني هذا وكنت أتمنى أعمل أكثر من كدة بكتير، ولو كنت أقدر أعمل أكثر كنت عملت، وأنا عمرى ما هنسى إني كنت قاعدة مع إلهام شاهين وقولتلها امشي علشان ماما هتموت بكرة، سيبوني علشان عاوزة أقعد معاها، مش عارفة إزاي حصل.
يسرا والأمومة
وعن الأمومة، قالت يسرا: جالي فترة كنت هموت وعايزة أبقى أُم، النهاردة بقول الحمد لله أنا راضية باللي ربنا كتبهولي، فيه حاجات لازم ترضي بيها، وحجات لازم تحاربي عشانها، وفي حاجات مينفعش تعاندي ربنا ولا الحقيقة للحصول عليها كلنا بنعرف نجامل، وكلنا عندنا 100 وش، وكلنا عندنا وجوه كثيرة نستعملها على حسب الظروف أو الوضع الذي نحن فيه، لكن الوجه الحقيقي هو الوجه الوحيد الذي لا يعرفه أحد غيرنا.