أكدت زوجة الفنان يحيى الفخراني، على أنه كان يتمتع بطابع شديد العصبية، خصوصًا عند مشاركته في العروض المسرحية.
وروت الدكتورة لميس جابر، موقف طريفًا حدث معهما، خلال حواراها مع الإعلامية إسعاد يونس، قائلة: “مش يحيى اللي خلاني امثل معاهم في الجامعة، ده كان حد تاني من زمايلنا، ووقتها شاركت معاهم في العرض، وفي ليلة العرض حصل غلطة على المسرح من الممثلين، وهو اتعصب ودخل الكواليس ومكنش عاوز يحيي الناس، وانا دخلتله وقولتلو مينفعش واقنعته وبعدها طلع”.
ليرد عليها الفخراني، قائلًا: “لأ هي بردو عملت حركة انثوية خلتني ملقيش بعدها مفر، كنت لابس جليه وهي قفلتلي الزرار، اهيه التزريرة دي دفعت تمنها 40 سنة”، لتمازحه لميس، معلقة: “لأ 50 حضرتك”.
زوجة يحيى الفخراني تروي تفاصيل اللقاء الأول بينهما: عزمنا على مسرحية بـ 10 صاغ
روت الدكتورة لميس جابر، زوجة الفنان يحيى الفخراني، تفاصيل اللقاء الأول بينهما، مشيرة إلى عشقه الشديد للمسرح.
وقالت لميس خلال حوارها مع الإعلامية إسعاد يونس، ببرنامج “صاحبة السعادة: “إسعاد كانت صغيرة وفي ثانوي وانا دخلت كلية الطب وكنا وقتها صحاب ونقعد نتكلم وكانت عندها فضول تيجي تزور الكلية ودخلتها المتخف بدل المشرحة عشان متخافش، وبعدين قالتلي انا عاوزة اروح المشرحة ودخلتها قالتالي ايه ده هو ده اللي يخوف، كانت جبلة، وبعدها واحنا ماشين في الكلية لقت اعلان لعرض مسرحي في الهوسابير”.
وأضافت: “قولتلها معرفش ووقتها روحنا نجرب ونشوف المسرحية في الهوسابير واحنا داخلين ندفع التذاكر، قابلنا يحيى في دخلة المسرح، ووقتها قال لنفسه انا عارف للبت السودا دي ام نضارة، وعزمنا على المسرحية ودفع 10 صاغ وقتها، وكان هو من ابطال العرض ده، ومن هنا بدأت الحكاية”.
وأردفت: “فضلنا اربع خمس ايام بعد ما حضرنا العرض نفكر ونخطط اننا نروح تاني عشان متشوقين نشوف ايه اللي هيحصل في الرواية”.