كشف الفنان يحيى الفخراني، كواليس تصوير مشهد العزاء في فيلم “الكيف”، مع الفنان محمود عبد العزيز.
وقال الفخراني خلال حواره مع الإعلامية إسعاد يونس، ببرنامجها “صاحبة السعادة”، المذاع عبر فضائية dmc: “مشهد العزا كان فيه حاجات مش في السيناريو وبالذات جملة انت جاي تعزي ولا اتهرج، فرديت عليه وقولتلو لأ جاي اهرج، فوقتها كان فيه مجاميع وانا قولت عاوزه اخد المشهد مره واحدة واني اضحكهم بجد فقولت للمخرج سبني اطلعوا لايف، وطلع بالمنظر ده وقتها لما خلصت محمود قالي هو انت بتشرب حشيش، قولتلو والله ابدا بس انا تخيلت المشهد انه هيبقى كده”.
يحيى الفخراني عن فيلم “الكيف”: محمود عبد العزيز كان عاوز دور الدكتور وأنا رفضت
أوضح الفنان يحيى الفخراني، تفاصيل مشاركته في فيلم “الكيف”، مشيرًا إلى ان الفنان محمود عبد العزيز كان يريد أن يجسد دور الدكتور بدلًا من المزاجنجي لكنه رفض.
وقال الفخراني خلال حواره مع الإعلامية إسعاد يونس، ببرنامجها “صاحبة السعادة”: “لما اتعرض عليا فيلم الكيف وقالولي المرة دي الموضوع هيكون مختلف وهيشترك معاك في البطولة حد تاني، وقتها بقى جابوا محمود عبد العزيز، بس انا اتعرض عليا الورق الاول واختارت دور الدكتور واديت لمحمود الدور التاني بس محمود وقتها قالي انت بتختار لنفسك احسن دور، ولما اقرى الورق قالي وحياة ابوك لتدهولي بس انا قولتلو لأ الدور ده هيبقى ألذ عليك وهتقدمه بشكل مختلف”.
وأضاف: “عشان اعمل الدور لفيت على مصحات واقسام ومستشفيات كتير اوي عشان اشوف حالات ادام عنيه، ووقتها قالولي فيه واحدة جاية بالطيار ببتعالج من الادمان وتشوف المنظر على طبيعته فروحت ولقيت مشهد فظيع جدا بالريالة والتشجنات، ووقتها عملت بروفة على المشهد قبل ما اصورو عشان كنت عاوز اعمل المشهد مرة واحدة”.
وتابع يحيى الفخراني: “وبالفعل عملته كما لو انسان مدمن بالظبط، ووقتها كان فيه حاجة مش مظبوطة في المعدات فوقفوا التصوير، وحاولوا أني اعيد المشهد تاني زي ما عملته بس مفيش مش راضي يطلع، فأجلنا التصوير لتاني يوم ووقتها عملتوا صح”.