أكد الفنان يحيى الفخراني، على أن عدد كبير من نجوم الوسط الفني قد رفضوا مشاركته والوقوف أمامه في فيلم “خرج ولم يعد”، موضحًا أن الفنان عادل أدهم واحد منهم.
وقال الفخراني خلال حواره مع الإعلامية إسعاد يونس: “فيلم خرج ولم يعد بعتوه لناس كتيرة جدا، وكلهم رفضوا أنهم يقفوا ادامي ساعتها لأني كنت صغير، ومنهم عادل أدهم رفض هو كمان”.
وأضاف: “فريد شوقي الوحيد اللي قبل، بس مكنش مقتنع الاول من فيلم خرج ولم يعد، لكن لما بدأنا التصوير قالنا ده طلع فيلم حلو”.
يحيى الفخراني يقع في خلاف كبير مع محمد خان بسبب فأر
من جانبه، روى الفنان يحيى الفخراني، تفاصيل مشهد تصويره أمام فأر في فيلم “خرج ولم يعد”، الذي أشرف على إخراجه المخرج محمد خان.
وقال الفخراني خلال حواره مع الإعلامية إسعاد يونس: “انا مبحبش الفيران زي كتير من الناس، فلاقيت خان بيقولي انت هتكون نايم كده والفار هيمشي قدام وشك، وهو اصر اني اصوره وشديت معاه عشان مصورهوش، ووقتها كان فيه ازمة في مصر الفيران اكلت المحاصيل فمصر قضت عليهم، وقتها طلع خمسة جنيه لطفل وراح جاب شوية فيران”.
وأضاف: “وشديت جامد معاه، وحلها طارق مدير التصوير وربط رجله بحيث انه ميمشيش من قدام وشي، ووقتها حتى الفار مات من الخوف”.