كشف الفنان وليد فواز، عن علاقته بالفنان الراحل مصطفى درويش، متمنيًا أن يتم تكريم الفنانين في حياتهم وليس بعد وفاتهم.
وقال وليد فواز خلال حواره في برنامج من مصر، الذي يتم عرضه عبر شاشة قناة cbc : لا أدعي إن مصطفى الله يرحمه كان صديق مقرب، ولكنه كان صديقي، واشتغلنا مع بعض في بدايتنا، فيه مسلسل من إخراج ماندو العدل، وهو كان بيتلمس طريقه لسه.
وتابع: «مكنش في بينا مشاهد كتير بس جمعتنا كواليس كتيرة، وكل كلمة اتكتبت عنه حقيقي، هو إنسان كويس أوي ولطيف أوي، ومكنش بيجاهر أبدا بفعل الخير، وكان بيصدرلي طاقة إيجابية جدا وكان بيباركلي على أعمالي، برسالة أو مكالمة».
وتطرق وليد فواز، في حديثه عن فكرة تكريم الفنان بعد وفاته وليس قبلها، قائلًا: ليه الناس الحلوة زي مصطفى بنستنى لما يتوفوا ونقول الكلام الحلو عليه، ليه مبنقولش الكلام ده وهما عايشين، مصطفى كان بيشتغل كويس وكان ممثل كويس جدا، بس كان مستني من الناس الاعتراف بموهبته، وبتمنى إن أي فنان وإنسان ياخد حقه وهو عايش.
وفاة مصطفى درويش
وفي سياق آخر، رحل مصطفى درويش يوم الاثنين الماضي، الموافق 1 مايو الجاري، بسبب سكتة قلبية مفاجئة، حسب ما أعلن شقيقه، وأثارت وفاته حالة ضجة وصدمة كبيرة لدى محبيه وجمهوره وزمايله .