دعا قطاع عريض من رواد مواقع التواصل الاجتماعي إلى مقاطعة الشركة المصرية للاتصالات “we” ، ومخاطبة لجنة الاتصالات وتكنولوجيا المعلومات في مجلس النواب في ظل تصاعد الشكاوي من جموع المواطنين بسبب تدهور خدمة الانترنت المقدمة من الشركة.
وقال أحد رواد مواقع التواصل الاجتماعي ، “شركة وي بقت بتسرق علني كده باقة النت الأرضي بتخلص في نص الشهر 140 جيجا ازاي يعني مش فاهم”، وقال أخر ، “هو كل شهر شركة وي تخصم يوم من الاشتراك ! انا بقالي كذه سنه بجدد يوم ٨ يعني الطبيعي اليوم ثابت مش مرة 7 ومرة 6”.
واصل رواد السوشيال ميديا توجيه الانتقادات إلى الشركة المصرية للاتصالات “we” وقال أحدهم ، “لما باقة ٢٠٠ جيجا مايكملوش ١٥ يوم فى حين ان كانت الباقة الـ 140 جيجا بتكفينى الشهر كله وبتفيض مع انى استهلاكى هوه هوه والسرعة سبيدتيست هيه هيه يبقى فيه حاجة غير طبيعية فى شركه we بالنسبة للنت الارضى” ، مضيفاً ، “لما اطفى الراوتر يوم ولا قى مستهلك من الباقى فى اليوم ده ٢٠ جيجا يبقى احنا بنتسرق عينى عينك النت دلوقتى مابقاش كماليات او رفاهية بقينا بنعمل شغلنا عليه والامتحانات عليه واصبح لا غنى عنه دلوقتى عايزين حل للموضوع ده حرام اشحن ب٥٠٠ جنيه نت فى الشهر واستهلاكى ماتغيرش بالعكس استهلاكى قل لانى كنت الاول قاعد فى البيت عشان كرونا دلوقتى موش قاعد مع العلم كل يوم بغير الباص وخافى الشبكة”.
وقال أخر ، “حد ملاحظ إن شركة WE بدأت تسرق في الميجابايتس الخاصة بالانترنت المنزلي adsl عشان الناس تلبس وتشتري باقة إضافية قبل ما يخلص الشهر؟ او تجدد تاني قبل ميعاد التجديد؟؟ ، دلوقتي أقل حصة شهرية 140 جيجا مبقتش تكمل 10 أيام 14 يوم بالكتير وفي ناس ليها حصص شهرية 200 جيجا وبتشتكي برضه ، الحوار بدأ من كذا شهر وناس كتير بتشتكي بس كل واحد بيشتكي مع نفسه فالناس فاكرة المشكلة فردية مش جماعية وعامة ، الاستخدام بيبقى تصفح بس ومفيش يوتيوب او يوتيوب قليل جدا وبتلاقي الباقه خلصت بشكل سريع ، أنا عملت اختبار بنفسي لكذا يوم قفلت الراوتر نفسه عشان منقولش حد سرق الواي فاي مع ان عليه حمايه وبدخل علي MY WE بعد ما اشغله الاقي الباقه بتقل ، ياريت لو حد عنده نفس المشكلة نجمع بعض ونعمل ضغط على الموضوع دا سوشيال يمكن صوت الناس يوصل”.
من جانبها ، استنكرت أسماء كمال أحد عملاء شركة “وي” تدهور الخدمة ، وتساءلت “انا جددت خدمة الانترنت من حوالي أسبوع والنهاردة فؤجئت برسالة من الخدمة بإستهلاك 70 في المية من الباقة على الرغم أن الباقة كانت بتستمر معايا لفترة أطول على مدار الشهور اللي فاتت”.
وطالب رواد مواقع التواصل الاجتماعي من مجلس النواب اتخاذ إجراءات حاسمة ضد الشركة لمعرفة أسباب تدهور الخدمة ، وكيفية إيجاد حلول سريعة لها ، لاسيما وأن شكاوي المواطنين من الشركة لم تتوقف عند هذا الحد حيث قامت الشركة المصرية للاتصالات ، بإلغاء جميع السرعات القديمة دون الرجوع لعملاء الشركة ، واستحدثت سرعات جديدة ، إلا أن الأمر لا يرضي العملاء وسبّب ضيقا لهم.
كما أن هناك شكاوى كثيرة وردت بخصوص بطء سرعة الإنترنت ، نتاج قرارات شركة الاتصالات ، وعلى سبيل المثال المشتركين الذين لديهم سرعة إنترنت 1 ميجا تحميل غير محدود ، أصبحت باقته الجديدة تقارب الـ30 ميجا وتحميل 140 جيجا فقط ، وهذا يعني لبعض العملاء أنه سينتهي من التحميل في مدة قصيرة وسيضطره لدفع باقة جديدة لاستكمال أعماله خلال الشهر الواحد ، ما يعتبر تكلفة زائدة عليه دون داع”.