كشفت الفنانة هالة صدقي عن تفاصيل بداية دخولها المجال الفني، وذلك خلال ندوتها اليوم التي أقيمت على هامش تكريمها من مهرجان الأقصر للسينما الإفريقية.
وقالت هالة صدقي: «أنا كان نفسي من وأنا صغيرة خالص أن أنا ادخل معهد الباليه لكن للأسف سني مكانش مناسب، وأهلي مرضيوش عشان لقوا أني هضيع سنتين أو تلاتة لكن كان عندي هدف أني عايزة أمثل”.
وأضافت: «وبعدين جت الفرصة مع الأستاذ نور الدمرداش فيه لا يا ابنتي العزيزة لأني كنت بلعب سباحة وهو كان بيدور على واحدة بتلعب سباحة، واتعرفت عليه بالصدفة».
تابعت: «وأقنعت أهلي أني هعمل عمل واحد بس من نفسي.. وأهلي كانوا متحفظين لأنه الفكرة اللي كانوا واخدينها من الإعلام على أن الفنانات عايشين حياتهم بالطول وبالعرض ولازم يبقوا بيشربوا ومش كويسيين.. وكان الأفلام العربية بتاعتنا القديمة وقليل من الإعلام كانوا بيدوا صورة وحشة للفنان ودا كان بيقلقهم».
وفي نفس الندوة، أعربت هالة صدقي عن رأيها في حال المسرح المصري في الفترة الحالية، حيث قالت: «أنا عاشقة للمسرح وبحب المسرح جدًا ومتمنية جدا، وفي الفترة الأخيرة كان فيه عروض مسرح كتير فعلا، لكن دا مش مسرح، أنا حاسة أننا بنروح نعمل اسكتشات ».
وأضافت: «وحتى لو فيه جمهور للفن المصري والفنانين المصريين، لازم يبقى فيه شوية تنظيم للفرق المسرحية اللي بتسافر تعرض في البلاد العربية لأن في الأخر دي اسمها فرق مصرية».
وتابعت: «مهم أوي اننا نعرف احنا بنقدم ايه، وكيس اننا نستغل فرصة أن فيه جمهور عايزنا وجمهور حابب يتفرج علينا بس هو المهم احنا بنقدم ايه ».