قال النائب مصطفي بكري «مكانش فيه تنمية في الصعيد و90 % من القرى لم يكن فيها صرف صحي، لكن الوضع بيتغير الآن، تنمية صعيد مصر بدأت في عهد الرئيس السيسي ليمنحنا الأمل، ويشعرنا أننا جزء من أبناء هذا الوطن».
الجيش يتحمل الصعاب
وأضاف في برنامج «حقائق وأسرار» المذاع على قناة صدى البلد«اللي يعطلنا أو يشوه الخطط لا يمكن يكون مصري، فحينما يخرج البعض ويدعي كذبا أن الجيش يسيطر رغم أن القطاع الخاص واخد حقه وزيادة، بلاش تلعبوا وتبتزونا، أهدرتوا الفن وأسأتوا للسينما، في مهرجان ما يعلم بيه إلا ربنا، لا مننا ولا حتى من قيمنا».
واستكمل بكري «الجيش بيتحمل اللي مايتحملوش البشر، من ضوابط وإنجاز وإشراف على تنفيذ المشروعات لصالح مصر، وليس من أجل كنز الثروة، واللي يقف ضد الجيش جيش بلده يبقى بيخون الرسالة بتاعة بلده وبيدعي عليها الكذب».
وأوضح «الأخ ساويرس بيتهم جيشنا ويزعم إن القطاع الخاص لا يشارك في مشروعات البلد، وهو في سنة 95 مكانش معاه 5 ملايين والنهاردة ثروته 240 مليارجنيه من البلد ، كل سنة بيكرر الكلام ده فارحم نفسك شوية وارحمنا، أنت في أيام الإخوان سبتنا ورحت مشيت برا مصر، احرصوا بقى على البلد وأمن مصر، كلامك بيضرب في الاستثمار».
4500 شركة خاصة شاركت بمشروعات الدولة
وتابع « هناك 4500 شركة خاصة شاركت بكافة مشروعات الدولة، فأرجو أن تكون المرة الأخيرة التي تذكر فيها جيش بلادك أو تتطاول عليها، وفلوسك اللي برا ربنا يكرمك بيها، لكن البلد فيها رجالة بتدافع عنها، ونحن لها ولن نسمح لأي أحد بالتطاول على جيشها، فكفاك إذا أنت متصور أنك محمي، لا بقى أنت ولا غيرك محمي فاحترم نفسك والدولة ونحن نحترمك».
واختتم: «مصر دي البلد اللي ملناش غيرها، وأنت تعرف تروح في أي حتة وتدفع فيها ملياراتك إنما إحنا ولاد البلد البلد دي منعرفش نطلع منها لانها بلدنا ، وسوف ندافع عنها بكل قوة».