مش لاقيه حلول لمشكلتي .. سابوني امشي من العزل وأنا مصابة بفيروس كورونا.. بهذه الكلمات بدات مواطنة في محافظة الإسكندرية حديثها عن المأساة التي تعيشها مع فيروس كورونا المستجد، ومدى الإهمال في عملها والقطاع الصحي بالمحافظة.
وقالت المواطنة في الفيديو : “اي موظف حكومي مصاب بـ كورونا بيحصل معاه كالأتي انا روحت المستشفى الحكومية بتاعتي وقالولي اني مصابة بكورونا من 5 ايام وقالولي ان اقعد في البيت حجر منزلي مش يكتبولي تقرير 14 يوم اجازة لا ليه هو انا هعدي نفسي بس لازم اعدي الناس كلها الأول”.
وأضافت قائلة: “عشان اخد اجازة من الشغل اتعرضت على لجنة طبية واللجنة ديه موجودة بعيد عن بيتي بقالي 5 ايام بموت بسبب الكحة واجبرت ان اطلب كريم وانزل عشان اروح مكتب رعايه مكتب كبير مليان نفس كتير وناس وانا حاولت على قد ما اقدر ان مالمسش حاجه عشان مأذيش حد”.
وتابعت: “معنديش جهود خالص وقلبي وجعني بسبب الكحة وعندي لجنة بكرة وطبعا هيبقى في ناس كتير وعشان اروح أي مكان بطلب كريم وبحاول اي حاجه المسها اطهرها عشان مأذيش الناس الغلابة اللي مش معاها فلوس تعمل مسحة او تتعالج”.
وأشارت: “ازاي اتمرمط كده وازاي ميبقاش في مسحة مجاناً عشان الناس الغلابة اللي بتموت بسببنا واحب اوجه رسالة للحكومة اللي انتوا بتعملوا ده غلط انتوا سبب ان الفيروس هينتشر تاني اللي عندوا كورونا مينزلش من بيته ويتحجر 14 يوم لحد ما يخف”.
واختمت حدثها قائلة: “الدنيا مش مظبوطة والاجراءات اللي احنا ماشين عليها ديه إجراءات غلط، انتو بتسيبوا الناس المصابة ماشية وسط الناس السليمة انتو كده بتعدوا الناس الغلابة اللي معهاش فلوس تتعالج.. وربنا يرحمنا برحمته”.