غالبًا ظهور ممثل في أكثر من عمل درامي في ماراثون رمضان لا يؤثر بالسلب عليه بل يعطي للجمهور دافع وحب له إذا كان أداءه التمثيلي متقدم، وهذا ما فعله الفنان محمد جمعة في الماراثون الرمضاني الحالي 2022، حيث ظهر في 4 أعمال درامية.
وأجرى موقع “أوان مصر”، حوار صحفي مع الفنان ذو الأربعة أرواح محمد جمعة ليكشف كواليس شخصيته في الأربع أعمال الدرامية الذي شارك بها وكيف تخطى أزمات التصوير.
ودار الحوار كالتالي:-
-في البداية كيف استعديت لتقديم شخصيتك في مسلسل جزيرة غمام؟.. ومين رشحك؟
-أول ما كلمتني جهة الانتاج وجالي الاسكربت، وعرفت أن السيناريست عبد الرحيم كمال، ده أول حاجه خلتني اتخضيت وحسيت إني داخل على حاجه كبيرة.. وأن أي حاجه تخص الكاتب الكبير عبد الرحيم كمال دي محتاجه فعلا واحد يقعد ويذاكر ويقرأ كتير عشان بتكون حاجه تقيلة وجامدة ومحتاجه فعلا اننا نذاكرها كويس أوي.
-اي تعليقك على ردود الأفعال الإيجابية بعد عرض الحلقات الأولى؟
-الحمد لله ولسا الحلقات الجاية في مفاجآت، وعبد الرحيم كمال في كتابته مش شرط تخش من أول الحلقات تخطف الانظار، وفي الاخر تلاقي الحلقات بتضعف.. لا الراجل كاتب رواية محبوكة جدًا، ومظبوطة من أولها لـ أخرها والاحداث الاخيرة هتبقى أقوى من اللي فات عشان هو ماشي بتسلسل طبيعي مش تسلسل تسابقي لرمضان فيه تكسير عظام، لا الراجل بادئ يحكاية حلوة ومش محتاج اتكلم عنه.
-كلمنا عن شخصيتك في العمل؟
-شخصيتي في العمل، ان الابن التالت للشيخ مدين الراجل توفى وكان عنده تلاتة هو متبنيهم، الشيخ محارب ومسلم، والشيخ عرفات وكل واحد فيهم واخد اتجاه معين ديني ومتشدد ووسطي وجانب ملائكي او ريحاني ويتعامل بالجب مش بالعنف.. فدول تلت سكك مشوقين.
-كلمنا عن شخصيتك في مسلسل المشوار ومين رشح حضرتك للمشاركة؟
-مسلسل المشوار شخصيتي فيه ان كنت سواق عربية نقل بتنقل الملح واللي رشحني الاستاذ محمد ياسين وجريت على طول من غير ما افكر، فانا لو عملت حتى ضيف شرف في عمل ويكون مخرجه محمد ياسين فدا شرف ليا.
– كلمنا عن شخصيتك في مسلسل دايما عامر.. ومين رشح حضرتك؟
-مسلسل دايمًا عامر كلمني الانتاج ومجدي الهواري المخرج صديق شخصي وجاتلي على الطبطاب، لأن كنت عايز اصلا أعمل أغنية وانزلها على السوشيال ميديا، وقالي تعالى يا محمد أنت صوتك معقول، مش عايز ادعي ان انا صوتي حلوي، وقالولي عايزينك في أغنية نوبي، وطبعًا اسامي المسلسل مش محتاجه ان انا اتكلم عنهم فمرفضتش طبعًا هي حاجه هتمناها من كلمات حسن المهدي واغنية دمها خفيف والحمد لله عملتها ومبسوط في ان انا شاركت في عمل زي ده، ولو متشافتش دلوقتي هتتشاف كتير جامد بعد رمضان.. وشايف ردود الافعال عليها بردوا حلو.
-مسلسل في بيتنا روبوت الجمهور أشاد بيه.. كلمنا عن رأيك في الفنان الشاب هشام جمال.. وشايفه فين في المستقبل؟
-أنا بحب هشام جمال لان هو شخص مجتهد وواحد في السن ده ليه أعمال ومش بينام عامل فرقة ومنتج ومسلسلات، وقدام في الافلام، وهو حد مجتهد وطاقة كبيرة وأنا بحب الناس اللي زي دي لان عارف ان مهما حد قاله حاجه سلبية مش هيقف.
-كيف استطاعت التوفيق خلال التصوير في مسلسل (جزيرة غمام- دايما عامر-في بيتنا روبوت-المشوار)؟
-التوفيق في التصوير بيكون بالتنسيق بين جهات الانتاج، ولما بطلع لمكان لمكان في التصوير بيكون بعد الخناقات بس الحمد لله لو أحنا معملناش كده في رمضان مش هشتغل.. وكذا مره بنقول لا يا جماعة عايزين نشتغل من بدري ونبقى هاديين ومش عايزين تسرع بس مفيش فايدة هو رمضان كده، بس بتمشي.
– من وجهة نظرك اي هو أفضل عمل رمضاني خلال الماراثون الحالي.. وبتوجه رسالة اي للبطل بتاعه؟
-أنا شايف رمضان السنادي في أعمال كتير حلوة ويختلف عن أي رمضان من فترة كبيرة أوي، وفي أعمال كتيرة بتنافس فمش هقدر أحكم على افضل عمل لكن ممكن أقول أفضل أعمال، والجميل في السنادي المواضيع كلها، والممثلين السنادي في تحدي أداء ودي حاجه كويسه ومفيدة لينا كلنا.