كشف الفنان فتحي عبد الوهاب عن كواليس مسلسله الرمضاني «جزيرة غمام» من خلال برنامج «the insider بالعربي» قائلاً: «المبارزة التمثيلية كانت موجودة بينا كلنا ماعدا أحمد أمين في المسلسل كانت من أجل جودة العمل، والمسلسل أجاب عن أسئلة بتدور في عقول الجمهور».
وأضاف فتحي عبد الوهاب: «أنا واحد من جمهور أحمد أمين، وكان مفاجأة ليا في جزيرة غمام بقدره إنسانيا وبحترمه فنياً، واحنا أكتر من صحاب وكنا كلنا بنتعلم من بعض وبناخد النصايح من بعض ونتقبلها كمان».
وعن مشاركته في مسلسل «الكبير أوى 6»، وخاصةً بعد ظهوره في مهرجان المزاريطة السينمائي أوضح فتحي عبد الوهاب: التجربة للأسف كانت قصيرة وممتعة جدا وصورت يوم واحد بس، وأنا من جمهور أحمد مكى وأعرفه من قبل ما يبقى ممثل، أعرفه وهو كان لسة مخرج، وهو مخرج مهم جداً وشاطر جداً ولو إدى وقت للإخراج هيبقى من أهم مخرجي الوطن العربي».
وتابع فتحى عبد الوهاب: «كان في فيلم هيتعمل ومكى المخرج فيه كان أسمع «عقد معقد» وكنت هقف قدامه وهو مخرج المرة دي بس توقف لظروف ما و السيناريو كان من كتابة أحمد مكى وفى تعدد فى الشخصيات يعني حوالي 7 شخصيات، وهو سيناريو رائع وجميل وفيه مفهومية وهو فيلم تجاري وهيعمل إيرادات مهولة».
وأكد عن دور أحمد مكي وسؤال الجمهور لماذ لم يقدم مكي الجديد: «مكي بيعمل تحديث للضحك طول الوقت، والضحك عنده مش بايت، وبيقدم شباب جداد وبنات جداد، وبيدي لكل ممثل مساحته، علشان كدة مبيقدمش».
فتحي عبد الوهاب: الفن ليس سببًا في انتشار الجرائم.. دي كوامن نفوس بشرية
قال الفنان فتحي عبد الوهاب أن الفن ليس سببًا في انتشار الجرائم في مصر، وذلك بعد اتهام العديد من رواد السوشيال ميديا للفن بأنه السبب في واقعة المنصورة.
وقال فتحي عبد الوهاب في تصريحات لبرنامج et بالعربي: لو الحكاية كده هل أول جريمة قتل في التاريخ كان مسلسلات برضه ولا إيه، في حاجة لها علاقة في غرائز البشر وكوامن النفوس البشرية، وربنا زي ما حط فينا الشر حط الخير.
وأضاف: فكرة أنه بناء على ثقافك وتربيتك وبيئتك وأخلاقك، بتغلب أنهي جانب واستعدادك لتحمل الضغوط ووعيك للواقع اللي يتعيش فيه، وده مالوش علافة بالمسلسلات والأفلام.
واختتم فتحي عبد الوهاب قائلًا: الفن بيرتقي بالروح والمشاعر مش وسيلة تربية ولا تعليم.. الفن عمره ما كان كده، الفن حر عن كده مش هنقدر نقول إن ده السبب، لأن كده إحنا بنحمل الفن أكتر مما يحتمل فأعتقد أن الكلام ده فيه قصور.