تحدث طه إسماعيل المحلل الرياضي عن الفترة الحالية التي يمر بها المنتخب الوطني في بطولة أمم أفريقيا 2021 المقامة بالكاميرون، وكشف عن العديد من الأمور التي تدور بعقل كارلوس كيروش المدير الفني لمنتخب مصر.
وفي حوار خاص لـ موقع أوان مصر مع طه إسماعيل شيخ المحللين، كشف عن رأيه في فرص منتخب مصر في التأهل للأدوار المتقدمة ببطولة أمم أفريقيا 2021.
س/ رأيك في مستوى بطولة أمم أفريقيا حتى الآن ؟
رأيي أن المنتخبات كلها لديها فرصة، لأن هناك تقارب في المستويات، ومافيش منتخب نقدر نقول عليه إنه فارق بشكل كبير عن باقي المنتخبات، وطبعا أقوى منتخب لحد دلوقتي هو منتخب نيجيريا.
س/ رأيك في كارلوس كيروش ؟
مدرب مبيضفش جديد مع منتخب مصر واللي عمله في مباراة نيجيريا كان تأليف وغير مقبول تماما ما يفعله مع المنتخب، بالرغم من امتلاكه سيرة ذاتية قوية ولكن لحد دلوقتي مش عارفين بيتصرف ازاي مع المنتخب.
س/ رأيك في مستوى منتخب مصر خلال دور المجموعات ؟
لما كيروش ألف في التشكيل عانينا في أول مباراة ولكن لما رجع كل اللاعبين لأماكنها الطبيعية اللعيبة لعبت بشكل جيد، ولكن عندهم أفضل من كده.
س/ رأيك بأداء اللاعبين في دور المجموعات ؟
اعتقد إن اللاعبين عندهم المزيد عشان يقدموه للمنتخب، ولازم يبقى في حمية أكتر من كده وشراسة في الملعب ويسبقوا المنافسين في كل حاجه لأن هناك تخاذل بعض الشئ من جميع اللاعبين.
س/ رأيك في فرص مصر في التأهل للأدوار النهائية في بطولة أمم أفريقيا ؟
عندنا فرصة في التأهل للأدوار المتقدمة، لأن المستويات كلها قريبة من بعض، وأعتقد إن منتخبنا الوطني عنده الفرصة للتحسن طالما كيروش مبيألفش في التشكيل، يلعب بس بالتشكيل المناسب وكل واحد في مكانه، واللاعبيه عليهم دور كبير.
س/ رأيك في تحميل كيروش مسئولية الأداء المتواضع مع منتخب مصر حتى الآن ؟
لا طبعا أمر مش مظبوط لأن اللاعبين عليهم دور كبير في إنقاذ الموقف وتحسين صورتهم أمام الجماهير ، واعتقد انهم لازم يبقوا أفضل من المستوى اللي ظهروا بيه لحد دلوقتي.