كشفت الفنانة الكبيرة شهيرة زوجة الفنان محمود ياسين عن ما هو الفارق بين جمال النجمات في جيلها والجيل الحالى، قائلة: «جمالنا كان طبيعي.. أما النهارده كلهم شبه بعض».
وقالت: «في جيلنا كان لكل واحدة من الفنانات كان ليها جمال خاص بها، ومكنش فيه الحاجات بتاعت دوقتي اللي هي فيلر وبوتكس، مكنش ممكن تروح للدكتور تقول أركب شعر، على عكس كل حاجة موجودة دلوقتي».
وأضافت مازحة: «يا ريت الحاجات دي كانت موجودة في الزمن بتاعنا، كنت طلبت أكون شبه مارلين مونرو»، وعلقت على نجمات الجيل الجديد قائلة: «أما دلوقتي كلهم شبه بعض»، لكنها عقبت قائلة: «فيه نجمات لهم جمالهم الخاص، اللى يؤهلهم لعمل أدوار معينة».
وأشادت شهيرة بالفنانة منة شلبي: «جمالها يعجبني.. وبسيط بتطلع تمثل من غير مكياج لكنها جبارة في التمثيل، وكان تعجبني هند صبري، وكمان بتفرج على ممثلات كتير بيعجبوني وبنبهر بيهم».
شهيرة: ربنا سخرني لخدمة زوجي حتى وفاته و كنت برفض أجيبله ممرضة
حلت الفنانة المعتزلة شهيرة زوجة الفنان القدير الراحل محمود ياسين ببرنامج كلام الناس الذي تقدمه الإعلامية ياسمين عز على فضائية MBC مصر، وكشفت عن تفاصيل الفترة الأخيرة التي قضتها مع زوجها الفنان الراحل محمود ياسين أثناء رحلة مرضه.
وقالت شهيرة إن ربنا كان مسخرها لخدمة زوجها طول فترة تعبه ومرضه، ورفضت الاستعانة بأى ممرضة لكى تتقاسم معها مشقة التمريض لرجل تجاوز عمره السبعين.
وأضافت شهيرة: «إن الطبيب المعالج للراحل محمود ياسين طلب منها أن تهتم بنفسها، وقال لها اهتمى بأستاذ محمود، وكل حاجة بس ليكى 4 ساعات في اليوم اهتمى بنفسك إنتى بس».
وأشارت شهيرة: «أولادى كانوا بيتخانقوا معايا عشان أجيب ممرضة بس كنت علطول برفض، وقررت خدمة زوجى محمود ياسين حتى يوم وفاته»، وأكدت أن ربنا سخرها لخدمة زوجها أثناء مرضه لأنه كان إنسانا جميلا، مضيفة: «مش كل واحد ضامن مين ممكن يشيله في مرضه».
وردت عليها الإعلامية ياسمين عز قائلة: «أنا مذهولة من رضا حضرتك وسعادتك أثناء الحديث عن الفنان الراحل محمود ياسين، ييجوا الناس بتوع مش ملزمة الزوجة تعمل إيه أكل أو مستلزمات المنزل، يسمعوا كلامك ويعرفوا يعنى إيه زواج وحب».