كشف أحد المقربين من أحمد ثروت نجل الفنان محمد ثروت، أخر تطورات حالته الصحية، حيث أشار أنه سافر ألمانيا، لإجراء عملية جراحية دقيقة بالمُخ، ليتم بعدها التعرف على نوع المرض، ووضع بروتوكول خاص لعلاجه في الفترة القادمة.
وكتب صديق أحمد ثروت منشورًا، عبر حسابه الشخصي بموقع التواصل الاجتماعي فيس بوك، جاء فيه: أحمد ثروت زميل صنعة زي ما بيقولوا، ومن شوية ضغط في الشغل في خلال السنوات اللي فاتت، جات له جلطة في عينه الشمال، والحمد لله بتتحسن ولكن تطور الموضوع أكتر، وجه له مرض في الأعصاب نادر أوي اسمه متلازمة الميلر فيشر، وده مرض بيجي 1٪ في المليون، بيخلي الجهاز المناعي يهاجم الجهاز العصبي، وحاليًا مأثر على رجله الشمال تمامًا، واليمين بنسبة 50٪ زي ما أحمد قال لي.
وأضاف صديق أحمد ثروت: الحمد الله عزيمة أحمد في حتة تانية خالص، وبيهزر وبيضحك ومؤمن ومبسوط أن ربنا اختصه، بس النهاردة يوم مهم جدًا، أحمد سافر لألمانيا، علشان المرض ده محتاج مركز متخصص لعلاجه، والنهاردة هيسحبوا عينة مياه من المخ، علشان يحددوا الموضوع أكتر، ويحطوا بروتوكول للعلاج بإذن الله.
وتابع: بناء على نتيجة النهاردة، هيتحدد حاجات كتير أوي، فضلًا وليس أمرًا ندعي لأحمد، لعلكم أقرب إلى الله أنه يشفيه، ويهون عليه ويربط على أبوه الخلوق الجميل، وأمه وأخته وخطيبته.