واحد من امهر لاعبي جيله خلال فترة التسعينات، انتقل من الزمالك للأهلي، في صفقه مثيرة للجدل وقتها، رضا عبد العال يفتح قلبة لـ “أوان مصر” يتحدث عن مشاكلة الأخيرة مع ربيع ياسين وعماد النحاس، يكشف عن وجهة نظرة في مدرب الأهلي والزمالك، والي نص الحوار :
– ما رأيك في مسيرة موسيماني حتى الآن مع الأهلي؟
قولت رأيي قبل كدا في موسيماني.. هو مدرب قليل فنيًا كل الدنيا هاجمتني، فوز بيتسو بدوري أبطال إفريقيا، الدوري المصري، كأس مصر وبرونزية العالم مش إنجاز عمله؛ لأنه كمل اللي خططله فايلر مع اللاعبين قبل رحيله، الدليل على كلامي أنه مع بداية الموسم الحالي، وعند تطبيق فكره على اللاعبين شايفيين أدائهم حاليًا لا حول له ولا قوة، الأهلي دايمًا يتعاقد مع مدربين أجانب كويسيين، مش عارف إيه اللي رماهم الرامية دي، أقل مدرب من أبناء النادي الأهلي أحسن من الجنوب إفريقي ألف مرة.
– ما السر وراء احتساب ركلة جزاء للزمالك في كل مباراة له.. وهل هءا طبيعي؟
مش غريب أن الزمالك يتحسب له ركلات جزاء في كل مباراة.. دا الطبيعي، دا دليل أن لاعبي الزمالك بيهاجموا على مرمى المنافس كثيرًا، ودائمي التواجد عند منطقة الـ 18 للخِصم، ركلة الجزاء التي تم احتسابها للفارس الأبيض أمام الأهلي في مباراة القمة بالدور الأول، تأكدت بناءً على الفيديو يعني الحكم ليس له دخل في ذلك، الأهلي لو لسة مع فايلر برضو كانت هتتحسب له ركلات جزاء كثيرة؛ لأن اللاعبين كانوا أكثر هجومًا من الفترة الحالية، الزمالك كل ركلات جزاءه بتكون في الـ 18، مبيكونش اللاعب مثلًا في خط الوسط والحكم يحتسبله ركلة جزاء، ركلة الجزاء اللي الحكم احتسابها لبدر بانون في مباراة الاتحاد، حد طلع وعلق عليها، ولا كابتن حسام حسن طلع اتكلم فيها.. لأ طبعًا لأن اللاعب كان في خط الـ 18 وحدث خطأ من لاعب الخِصم والطبيعي انها تُحتسب ركلة جزاء.
– تتوقع الدوري السنة دي هيكون للأهلي أو الزمالك ولا هيطلع بره؟
الدوري المصري السنة دي مش هيطلع بره الأهلي والزمالك، كنا ممكن نقول بيراميدز بس خلاص هو خرج بره المنافسة على اللقب، مش بقلل إطلاقًا من باقي أندية البطولة، كل الشكر بكل تأكيد لنادي سيراميكا كليوباترا وغزل المحلة على مجهودهم الرائع في الموسم الحالي، ولكن مش هياخدوا الدوري يعني، إحنا مش زي أوروبا يبقى لسة فريق طالع من الدرجة الثانية وممكن ياخد الدوري الممتاز عادي، الدوري المصري على وضوح كدا، مقرر أنه لازم يكون للنادي الأهلي أو الزمالك فقط، حتى تقنية الفيديو مطبقة عشان الأهلي والزمالك، إنبي ليه مياخدش الدوري المصري بكل الإمكانيات واللاعبين والطموح اللي عندهم ده؟.
– أين يوجد بيراميدز من المنافسة على الدوري المصري الآن؟
بيراميدز النادي الوحيد اللي كان ممكن ينافس على الدوري الممتاز، ولكن في حالة تواجد تركي آل الشيخ فقط، تركي آل الشيخ كان بيعمل منافسة قوية بين الأندية وبيراميدز، والدوري في الوقت ده كان له طعم تاني، تركي كان بيخوف جماهير الأهلي والزمالك من فريق الأهرام قبل كل ماتش؛ ودا بسبب المكافآت العالية جدًا اللي كان بيحفز بيها اللاعبين من أجل تحقيق الفوز، ومش بس اللاعبين، وكمان كان بيعمل مسابقات بجوائز قيّمة للجماهير على توقعات نتيجة المباراة، من الآخر كان بيصرف على الدوري بكل الطرق عشان يبقى لبيراميدز بشرف، الموسم اللي كان متواجد فيه آل الشيخ مع الفريق السماوي، كان الأحق بالفوز بالدوري المصري لكن هناك أيدي خفية أهدته للنادي الأهلي، الحاج فرج عامر الله يباركله كان يؤجل مباريات ويقدم أخرى كل ده لمصلحة الأهلي عشان يفوز باللقب، بصراحة موسم تركي آل الشيخ مع بيراميدز كان من حقهم وأشهد بكدا في كل حته، والكل عارف الحقيقة دي كويس.
– ما رأيك في لاعبي الأهلي.. ومن منهم لم يثبت نفسه حتى الآن وما السبب في ذلك؟
يوجد بعض اللاعبين في النادي الأهلي حتى الآن لم يثبتوا أنفسهم، طاهر محمد طاهر، محمود كهربا ووالتر بواليا لم يستطيعوا إثبات أنفسهم مع النادي الأهلي حتى الآن، تتعدد الأسباب لعدم ظهورهم؛ فمن الممكن أن يكون بسبب عدم إعطائهم الفرص الكافية والكاملة، أو لعدم انسجامهم حتى الآن مع لاعبي الفريق، ومن الممكن أن يأتي السبب أيضًا لأنهم كانوا على قدر كبير من الثقة في انديتهم السابقة قبل الانتقال إلى المارد الأحمر، لم نعرف السبب حتى الآني في ظهورهم بالأداء السيء هذا، وهذا لم يتواجد فقط في النادي الأهلي، بل يوجد في الزمالك أيضًا أمثال: مروان حمدي، حمزة المثلوثي وحميد أحداد فلم يثبتوا أنفسهم أيضًا مع فريقهم.
– ما سر تصريحاتك عن ربيع ياسين وعماد النحاس وتواجدهم في اعتصام الاخوان؟
أنا متبلتش على حد ولا جبت كلام من عندي، توجد فيديوهات تؤكد على كلامي بتواجد ربيع ياسين على منصة رابعة وعماد النحاس في النهضة بيرقص، أنا قولتلهم قبل كده لو طلعتوا قولتوا انكم مكنتوش في رابعة، هطلع أعتذرلكم على الهواء، والفيديوهات بتوضح وبتبين كل حاجة، وهي مش معايا أنا بس دي على اليوتيوب أي حد هيبحث هيلاقيهم.
– ترد بإيه على المحامي محمد رشوان بعدما تقدم بشكوى ضدك للنائب العام بسبب تصريحات ضد ربيع ياسين وعماد النحاس؟
أنا مجبتش كلام من عندي، ولا قولت لعماد النحاس يروح النهضة يرقص هناك، ولا قعدت ربيع ياسين على منصة رابعة يقول اسماء لاعبين، بلاغ إيه اللي هيقدمه المحامي محمد رشوان ضدي، الفيديوهات فيها كل حاجة تثبت كلامي، هو غاوي شُهرة عشان كل شوية يطلع يجيب سيرتي، يقدم البلاغ اللي هو عاوزه.. أ ب كدا هقدم الفيديوهات للنائب العام، وكل حاجة تثبت كلامي موجودة فيهم، والفيديوهات على اليوتيوب ومع كل الناس مش معايا أنا بس، رشوان ده غاوي شو وشُهرة، عاوز يعرف الناس كلها أنه شغال وأنه محامي، ماهو كل حد دلوقتي عاوز يطلع تريند أو يتشهر ويعمل فرقعة لازم يجيب سيرتي، هو عاوز يتشهر فدور على مين اللي موجود على الساحة في الوقت الحالي وماشي كويس، عشان يخبط فيه ويطلع على حسابه التريند.. طبعًا مفيش غير رضا عبد العال، هو لجأ للقضاء أعدل جهة في مصر حاليًا، وهو اللي هيبين الحقيقة وهينصر المظلوم وأثق أنهم سيحكمون بالعدل.. يعمل اللي هو عاوزة بقى، وبعدين أنا الحمدلله مش بتبلى عليهم في حاجة، الفيديوهات كلها موجودة في كل حتة على اليوتيوب، محمد رشوان غاوي فرقعة.. بس إن شاء الله القضاء هيقول كلمته وهينصر المظلوم، مسلسل الاختيار مثلًا، أتعمل ليه؟.. أتعمل عشان يكشف للناس كلها حقيقة الإخوان ونيتهم إيه من ناحية مصر واللي كانوا بيعملوه.
اقرأ أيضًا