روى المطرب والملحن رامي جمال موقف مؤثر تعرض له بسبب إصابته بمرض البهاق.
قال رامي في برنامج عالوعد الذي يتم عرضه على شاشة قناة sbc: «كنت خارج من الاستديو وسلمت على واحد، ومد إيده، ولما شاف إيدي، وسحب إيده، ووطى عمل نفسه بيربط الجزمة».
وأضاف:«أنا فهمت وقومت واخد عربيتي، وحاول يلحقني ويقولي أنت زعلت ولا إيه؟ قولت له، لا مزعلتش خالص، وروحت عند ناس صحابي كنا بنلعب بلاي ستيشن، وسبت دراع البلايستشن، وكتبت لو مقبلتونيش بالشكل ده، أنا معنديش مشكلة وعندي بيزنس تاني على الرغم من أن الفن بحبه جدًا لكن مش عايز يبقى وجودي بتعاطف».
وتابع :«أنا مش شايفه مرض عشان يبقى فيه تعاطف، ده حب من ربنا، وبيختبرني هل أنت راضي ولا لا؟ وأنا راضي جدًا، كتبت البوست الساعة 11، الدنيا مقلوبة بمعنى الكلمة، مفيش فن قدمته عملي حالة التعاطف اللي شوفتها دي، وأنا معنديش مشكلة من زعل حد بسبب القصة دي لكن عندي مشكلة أنك تتعاطف معايا كفنان بسبب مرضي».