كشف المستشار “محمد بيومي” خبير اللوائح، عن مصير الأنجولي “جيرالدو دا كوستا” مع النادي الاهلي في الفترة القادمة.
وقال “بيومي” لـ “أوان مصر”: “أزمة “جيرالدو” مع القلعة الحمراء هتفضل مستمرة ومصيرها معروف”.
وأضاف: “لا مفر الاهلي هيدفع الفلوس كاملةً للّاعب ومش عنده حاجة غير كده”.
وأكمل: “مسئولي المارد الأحمر هيلبسوا النادي في الحيطة وهما مبيفهموش وفاكرين نفسهم بيفهموا”.
خبير لوائح لـ أوان مصر: جيرالدو هياخد حقه كويس أوي
وأوضح: “والموضوع مُعقد ويتطلب خبرات كثيرة لكي يقدر المحامي أن يرد حق النادي، واللي بيمتلكه الاهلي معندوش خبرة في المواضيع دي وهيلبسهم في الحيطة وهيدفعوا كل الفلوس”.
وواصل: “سكوت مسئولي القلعة الحمراء عن التحدث في القضية حتى الآن يدل على أنهم مش عارفين يعملوا إيه، لأنهم لو وصلوا لحاجة هيطلعوا ويتكلموا في كل الدنيا”.
وأشار: “اللاعبيين الأنجولين أو الأجانب بصفة عامة، بيكونوا موكلين محامين عارفين يجبولهم حقهم إزاي ويلبسوا النادي في الحيط، وجيرالدو عمل كده مع الفريق الأحمر”.
واختتم تصريحه قائلًا: “لو أنا اللي ماسك قضية جيرالدو مع الاهلي كنت عرفت أمشيها صح، وكنت أخدت من اللاعب فلوس للنادي مش أديتله فلوس، بحكم خبرتي أنا حضرت قواضي زي كده كتير وعارف هعمل إيه ومحدش يقدر يلعب عليا في حاجة أبدًا؛ لأن ده شغل معلمين كبار لكن هما لسه تلامذه”.