تامر فرج/ كشف الفنان تامر تفاصيل وأسرار عن حياة الفنانين والنجوم الذي يعتقد البعض بأن حياة الفنانين مختلفة عن حياة الناس البيسطة، ولكنه نفى ذلك، وأكد انهم يعيشوا حياة عادية.
تامر فرج يفضح المستور عن حياة الفنانين (فيديو)
وروى ذلك من خلال بث مباشر عبر صفحته الرسمية “فيس بوك” قائلاً: “أنا كنت وعدكوا من فترة ان هعمل فيديو عشان اتكلم فيه عن الفن والفنانين وفعلا انا عملت الفيديو ده من فترة وكان نص ساعة والفيديو تقريبا كان في مشكلة ومكنش راضي يحمل ولا على الواتس اب ولا على الفيس بوك ولا على الانستجرام ولا اي حاجة قولت يمكن ربنا مش رايد ان اتكلم في الموضوع ده عشان كده هختصرلكوا اللي كنت بقوله في الفيديو”.
وصرح قائلاً: “من فترة عملت بوست كنت بقول في هل شتمت فناناً اليوم؟؟ هجموا عليا وقتها لان في ناس كتير اعتقدت ان انا بدافع عن فنانين كانوا راحوا عزا وبليل فرح بس انا الموضوع ده مكنش يهمني و كنت بتكلم في نقطة معينة واللي هي هل شتمت فنان اليوم؟ لان بصراحة يعز على قلبي جدا وجرحني جدا ان اشوف موجة غريبة من الحقد والغل على الممثلين والفنانين لدرجة اننا نقتحم حياته ونهين عرضهم ولازم نشتمهم “.
تعرف على أسرار عن حياة الفنانين
وأضاف قائلأً: “انت ممكن تقول رايك بتنتقد فنان وده حقك بس قول رايك بدون انك تشتموا وبدون ان انت تضايقه بالشكل ده عشان كده انا عملت البوست ده وكنت عايز اوريكم الفنانين دول مين وحسيت بالحقد والغل والكراهية ناحية الفنانين مع ان لما بتشوفونا في الشارع بتيجوا تتصوروا معانا وبتحبونا اوي وترجعوا بعد كده تشتمونا وانا معتقدين ان الفنانين عايشين عيشة تانية ومش زيكوا وانهم مختلفين عنكوا تماماً”.
وأوضح تامر فرج الحياة الذي يعيشها برفقة عائلته وأن حياته ليست مختلفة عن حياة الفنانين قائلاً: “عشان كده بقولكوا لا احنا زيكوا بظبط وبننتمي لنفس الشرائح اللي انتو بتنتموا ليها، واحنا كمصرين في مننا الطبقة الغنية، والطبقة المتوسطة وفي الطبقة الفوق متوسطة وفي ناس بتنزل لطبقة تحت المتوسطة.. وأنا حياتي اهي قاعد في البيت لابس شورت وتيشيرت وشبشب، وعايش في شقة غرفتين وصالة ومطبخ وحمام ووسط ناس عادية اه حواليا فنانين كتير بس معايا جيراني حواليا مواظفين اللي شغال في شركة واللي شغال في بنك، وعادي “.
وأشار أن الهدف الاساسي من هذا الحوار هو رسالة موجهها إلى المتابعين والجمهور والشعب قائلاً: “مش كل الفنانين عيشتهم مرتاحة البعض منهم فقط، واحنا بنتمرمط وممكن نشتغل بـ الـ22 ساعة متصلة عشان نفرحكوا ونبسطكوا، وشغلانتنا صعبة مش سهلة، زي ما البعض معتقد”.
وجاء تعليق على هذا الفيديو من الفنان صلاح عبدالله قائلاً: “رداً عالفيديو الرائع لزميلي وأخويا الصُغيٌَر Tamer Farag عن ثروات الفنانين…خدوا الخلاصة من عم صاصا”.
وأوضح قائلاً: “الوسط الفني زي أي وسط فيه اللي بياخدوا ملايين وفيه اللي بياخدوا ملاليم،وبينهما سلم تنازلي يصل إلى اللي بالكاد قادر يعيش واللي بياخد #مفيش #بس_كدا #آذان_العصر الله أكبر”.