فتح الإعلامي تامر أمين النيران على مؤدي المهرجانات حسن شاكوش بعد أزمته الأخيرة مع المطرب رضا البحراوي، وجاء هذا الهجوم بسبب تصريحات حسن شاكوش الذي صرح بيها وقال : “أنا حالي واقف، وأنا مش عامل جريمة”.
تامر أمين بعد تصريحات حسن شاكوش
وانتقد الإعلامي ذلك التصرف من خلال برنامج “آخر النهار” الذي يعرض عبر قناة النهار الفضائية قائلاً: “شاكوش قال حاجتين، الأولانية ماشي، التانية هي الكارثة. الأولانية قال أنا حالي واقف، أنا مبشتغلش، والتانية قال مع إني مرتكبتش جريمة، وهي دي في رأيي المتواضع الجريمة”.
وتابع قائلاً: “الجريمة يا شاكوش إن إنت لسه مش شايف إن إنت ارتكبت جريمة، وإن إنت شايف إن اللي عملته ده عادي، وإن بالمنطق اللي إنت فيه لو النقابة طلعتلك تصريح غنا تاني هتعمله تاني”.
وأشار قائلاً : “الجريمة يا شاكوش إن إنت مش مقدر قيمة خشبة المسرح اللي إنت واقف عليه، مش مقدر يعني إيه كلمة فنان، والفنان ده رسالة وقيمة وقدوة ورمز ومعنى ووطنية وكل حاجة، قبل ما يبقى كلمتين في أغنية”.
وأضاف قائلاً: “ولو انت مش شايف ان كدة غلط ده في حد ذاته غلط، وانت متعلمتش من الخطأ وارجو من اصدقاء شاكوش يقولوا لا يا شاكوش الضرب مش كدة واللي حصل ده جريمة والدنيا اتقلبت عليها وكلنا لو بنحب اغانيك فمش هنسمح لكدة ابداً، لان ده ليه علاقة لصورتنا قدام الوطن والعالم، والفن الهابط خطره لا يقل عن خطر المخدرات وكفاية نغيب عقلنا اكتر من كدة”.