تسببت دعوة حادثة المأذون ياسر القرشي الذي نصح المقبلين على الزواج بتعجيل عقد الزواج قبل صدور قانون الأحوال الشخصية الجديد الذي يقترح دفع اشتراك في صندوق رعاية الأسرة، ردود أفعال واسعة من رواد مواقع التواصل الاجتماعي، لينقسموا ما بين مؤيدين ومعارضين، من خلال قيام الزوج برواية قصة صادمة معه بعد خلافه مع زوجته وطلب الطلاق.
وتداول أحد رواد مواقع التواصل الاجتماعي فيسبوك يدعى كريم، يعمل محاميا، متزوج قصة حدثت مع المأذون خلال خلافات أسرية بينه وبين زوجته.
وقال الزوج والمحامي: المأذون اللي كاتب يلا عجلوا بالزواج قبل رسوم الصندوق أعرفه كويس، ده صديق شخصي، بداية معرفتي بيه صاحي من النوم لا بيا ولا عليا لقيت المدام بتقولي طلقني، طيب فيه إيه هو أنا ضايقتك في الحلم مثلا؟، قالت لا هو كده ويلا لازم ننزل للمأذون دلوقتي، يهديكي يرضيكي مفيش حل.. المهم قولتلها طب هنزل أجيب حاجة من العربية وكلمت المأذون ده قولتله بص إحنا هنيجي هتقولها يابنتي ده أبغض الحلال والكلمتين دول وتبوظ الموضوع.
وتابع الزوج: رحنا أول ما دخلنا هات يا ابني بطاقتك وإنتي بطاقتك، وأنا طلعت بطاقتي مش مدي خوانة، وهوب بدأ يكتب وشغال الله ينور، وأنا طبعا في سري بتمتم بشوية كلمات من اللي قلبك يحبهم، بعدين قولتله طب ما تيجي بره في كلمتين يا مولانا أعرف أتعابك كام، طلعنا أنا وهو بره فبقوله ده اللي اتفقنا عليه؟، قالي ما هي مصممة قولتلة هي لحقت تقول السلام عليكم حتى، قالي طب خلاص أخد أتعابي ألفين جنيه، بصتله كده وقولتله ماشي اتفضل، المهم دخل تاني وقالها إيه يا بنتي الاستعجال في خراب البيوت ده؟، دا إنتي معاكي راجل جوهرة وأدي الورق اهو وراح مقطعه، طبعا وانا قاعد قعدة عادل إمام لما دخل الجامع في فيلم مرجان أحمد مرجان التقوي بتشر من وشي.
وأكمل الزوج: المهم بعد شهرين كلمته تاني قولتله فيه ناس صحابي هيتجوزوا وعايزين مأذون تاخد كام؟، قالي 5 آلاف قولتله أمين، راح وكلمني قالي إيه يا باشا دول ساكنين في قصر ده 5 آلاف قليل أوي، قولتله خلاص إحنا اتفقنا معاهم، فقالي حاضر علشان خاطرك وفعلا كتب الكتاب، وخلص وبيسأل على فلوسه فالناس بلغته الفلوس معايا، راح مكلمني معاك الـ5 آلاف، قولتله أه بس ناقصين ألفين بتوع الاشتغالة فاكرها، أنت حبيبي ومولانا وفضيلتك وكل ده على دماغي لكن تشتغل محامي لا عيب عليك.. مش أنا.
وكان قد نصح مأذون شرعي المقدمين على الزواج بسرعة إتمام إحراءات الزواج عبر على صفحته الرسمية بموقع التواصل الاجتماعي فيس بوك .
وكتب عبر صفحته:”الإخوة اللى حاجزين لدى المكتب عقد خلال شهر يناير 2023 ( نصيحة عجلوا بالعقد ان استطعتم ) واجعلوا الفرح فى اى وقت تحبون لأن القانون الجديد سيصدر قريباً ..قال النبى صلى الله عليه وسلم – (ما مِن عامٍ إلَّا والَّذي بعدَهُ شرٌّ منهُ حتَّى تلقَوا ربَّكم ) ونسأل الله تعالى أن ييسر الزواج لكل شباب المسلمين .