كشف الفنان أحمد زاهر عن أسباب مشاركته في حكاية “كدبة كبيرة” من مسلسل وراء كل باب، وجاء ذلك خلال حواره مع الإعلامي رامي رضوان ببرنامج “مساء دي ام سي”.
وصرح قائلاً: “انا وافقت على المسلسل ده بسبب ان حصلي موقف في جنازة دلال عبد العزيز اني اتهمت اني اتعديت على صحفي وضربته وكسرتله الموبايل وده محصلش خالص”.
أحمد زاهر يكشف سبب مشاركته في “كدبة كبيرة”: جنازة دلال عبد العزيز
وروى تفاصيل ما حدث معه في جنازة الفنانة الراحلة دلال عبد العزيز قائلاً: “انا كنت ماشي وخارج برا المقابر خلاص وفجأة لاقيت واحد داخل يصور بالموبايل في بوق بنتي، وهو كان واحد عادي لابس قميص وبنطلون ومعرفش انه صحفي وانا مسكت موبايله ونزلته وحطيته في ايده التانية”.
وتابع قائلاً: “وقولتله عيب تصور حد منهار فين السبق الصحفي في كده وانا مشيت وخدت بناتي وهو قعد يشتم وبيقول احنا اللي عملناكوا وكلام كتير سيبته ومشيت احتراما لحرمة المقابر وانا كنت رايح اعمل الواجب وامشي”.
وأضاف قائلاً: “وكنت جاي من الساحل وراجع تاني صد رد عقبال ما وصلت الساحل لاقيت كمية هجوم فانا لو طلعت رديت زي يحيى هل الناس كانت هتصدقني وبعد الواقعة ديه لاقيت المسلسل جالي ولما قريت القصة قولت انا لازم اعمله دلوقتي، حتى تصل الرسال الحقيقية للجمهور الذي أصبح منساقًا تمامًا وراء السوشيال ميديا”.
أحمد زاهر عن السوشيال ميديا: “التريند أصبح كارثة”
وأشار زاهر قائلاً: “التريند اصبح كارثة ممكن يدمر حياة أي انسان في لحظة، وعند ظهور الخبر المسيء ينتشر بسرعة البرق ويأخذ حيز كبير من اهتمام الناس بينما يحدث العكس عن ثبوت البراءة، مش كل الناس اللي سمعت المشكلة بيوصلهم براءة هذا الشخص”.