عبر الفنان أحمد التهامي، عن شدة حزنه وغضبه من الفنان تامر حسني، وذلك بسبب عدم التواصل معه بعد أن تأكد من أن هناك تشابه فيلم تامر الجديد الذي يحمل عنوان تاج، مع قصة فيلم أحمد التهامي الذي لم ترى النور بعد .
وقال أحمد التهامي، خلال حواره مع برنامج MBC Trending: أنا لما قرأت موضوع الإعلان بتاع فيلم تامر حسني قعدت يومين تعبان جدًا، واكتأبت جدًا إن حلمي بيتاخد أو بيضيع، وفكرة البطل الخارق هي قريبة مني وقولت أكيد هعملها كويس وبقيت أفكر في الحكاية تتعمل إزاي، لقيت إن لازم يكون فيها جزء يجذب الناس، فافكرة إن يتعمل حدوتة فيها اتنين إخوات تؤام واحد بطل خارق، والفيلم اللي أنا كاتبه اسمه خِلف خلاف، وفعلًا سجلت الفكرة في الرقابة والشهر العقاري في 2017.
وتابع: بدأت أسعى للموضوع في شركات الإنتاج الكبيرة، وأنا بسعى كان معظم الناس بتقول دي فكرة بعيد أوي عننا ومش هتحقق إيرادات وتكلفتها عالية.
وأوضح أحمد التهامي أنه حاول بكل الطرق أن يتواصل مع الفنان تامر حسني، مشيرًا: كلمت ناس حوالين تامر حسني، وناس من شركة الإنتاج إن هما يوصلوني بيه، ولكن ملقتش رد من تامر وده زعلني، وجالي رد من الجهات الإنتاجية بيقولولي إن تامر زعلان، أنا مغلطتش في تامر، بالعكس أنا اللي زعلان أنه مكلمنيش يعرف إيه الموضوع أو نقعد مع بعض، بالعكس قالولي أنت ممكن تروح الرقابة إذا كان الموضوع متشابه ولا لأ.
وقال التهامي: من حق أي حد يعمل أي حاجة طبعًا، وتامر حسني فنان كبير جدًا وأنا بحبه، وأنا مستني طرح الفيلم وأنا مقدرش أقول أي حاجة ولما نزلت البوست كان علشان أنا مش عايز ألجأ للحاجات القانونية، أو أزعل صحابي وزملائي مني، إحنا فنانين في الأول والآخر، ومش بنتكلم على شركات إنتاج وماديات، بنتكلم على الفكرة وحقوق الملكية الفكرية، وأنا مكنتش عايز أدخل في صدام، ولا ألجأ للشئون القانونية وأكبر الموضوع، بالعكس.
وأضاف أنه في حالة عدم تشابه الفيلمين، سيقدم اعتذارًا للفنان تامر حسني، معلقًا: لو طلع الفيلمين مختلفين هقدم لـ تامر حسني اعتذار، وأنا مكنتش أعرف أن تامر هو اللي بيكتب الفيلم، وقولت لو هو اللي بيكتب الفيلم يبقى مايعرفش أي خط من خطوط العمل وحد وصل له ده، لأني قولت أن فيه ناس مؤذية كتير وعايزة تحرق الفكرة بتاعتي، وقولت مش معقول توارد الأفكار توصل بالتقارب ده أوي، وطبعًا الموضوع يضايق ولكن أنا مش عايز أسبق الأحداث وأخد إجراءات قبل ما أشوف الفيلم.
وعن سؤال في حال تشابه قصة الفيلمين، فهل سيتخذ أحمد التهامي إجراء قانوني ضد الفنان تامر حسني؟ رد، قائلًا: فيه حقوق ملكية فكرة، ولام يتاخد فيه خطوة لأن دي من حقي.
واختتم التهامي حديثه مقدمًا رسالة لـ تامر حسني، قائلًا: وبقول لـ تامر حسني أنا بحبك على المستوى الفني والشخصي، وكنت مبسوط إني اشتغلت معاك، ومفيش أي حاجة على تامر وحشة، وتامر نجم كبير وناجح، وكنت أتمنى أنه يكلمني ونشوف هل فيه تقارب في القصة ولا لأ.