هناء الشوربجي| رغم أنها كانت ضيفة شرف في مسلسل “راجعين يا هوى”، إلا أنها استطاعت أن تخطف الأنظار، وتصدرت مواقع التواصل الاجتماعي لبراعتها في أداء الدور.
وأجرى موقع “أوان مصر”، حوارًا صحفيًا مع الفنانة القديرة هناء الشوربجي، لتكشف تفاصيل شخصيتها في مسلسل “راجعين يا هوى”.
وجاء نص الحوار كالتالي:-
-ما الذي جذبك للمشاركة في مسلسل راجعين يا هوى.. ومين رشحك للعمل؟
اللي جذبني في المسلسل إن الكاست كله حلو، خالد النبوي كان نفسي أشتغل معاه لأني بحبه جدا وكان نفسي أشتغل معاه، فانبسطت إن جالي مشاركة معاه في العمل ده، ده غير إن مخرج العمل هو محمد أسامة، وانتاج شركة كبيرة، فده شدني، ولا يهمني الدور صغير او كبير انما المهم إن العمل حلو، الناس تحب تتفرج عليه، والحمد لله ده حققه المسلسل وعمل نسبة مشاهدة عالية.
-من الذي رشحك للعمل؟
اللي رشحني للعمل المخرج محمد أسامة والفنان خالد النبوي، قالي أنا مرشحك، وكان نفسي أشتغل معاكي.
-تعليقك على ردود الأفعال الإيجابية التي حققها المسلسل؟
مبسوطه بردود الأفعال الإيجابية اللي حققها المسلسل، يعني أنا كنت متوقعة أنه هيبقى حلو، وتوقعي جه في محله.
-ماذا عن تعاونك مع الفنان خالد النبوي.. ونجله نور وأي رأيك في أدائهم؟
كان نفسي أشتغل معاه، وفوجئت بابنه نور موهبة وانبسطت جدا منه لأنه طالع جميل، وظله خفيف وعنده حضور وهيكون ليه مستقبل حلو، ومتوقعه أنه هيكون حاجه كويسه.
-كيف تختار هناء الشوربجي الأدوار التي تخوضها؟
انا بحب الأدوار تبقى حلوه ميبقاش فيها اي حاجه تسئ ليا وبحب الأدوار المحترمة، وده اللي خلاني أختار الدور ده، ودايما بدقق في ادواري، دايما بحب أعمل حاجه مندمش عليها بعد كده، او حاجه مكسوفه منها لازم تكون حاجه فخورة بيها.
-هل يوجد صعوبات واجهتك في التصوير؟
لم يواجهني اي صعوبات التصوير كان سهل والناس كلها حبتني، وأنا كنت سعيدة اوي وبشتغل مع مجموعة حلوه، وفاء عامر وانوشكا وهنا، ونور وكان كل الكاست حلو.
-هل سنرى هناء الشوربجي من جديد بعد انتهاء الماراثون الرمضاني؟
اتمنى إن أنا أعمل حاجه جديده بعد رمضان، واي حاجه هتجيلي حلوه طبعا هوافق.
