أعلنت الفنانة الأردنية نور طاهر، إحدى بطلات المسلسل الأردني “مدرسة الروابي للبنات”، عن تعرضها للإصابة بمرض الصرع، وجاء ذلك من خلال حسابها الرسمي بموقع التواصل الاجتماعي “فيسبوك”.
وكتبت نور طاهر: “من زمان كتير کنت اصحي الاقي حالي على الأرض لأني كنت فاقده الوعي و ما كنت أتذكر أي تفاصيل، كنت اصحى عندي وجع براسي و مش قادره اتطلع على اي ضوء، و کنت مش فاهمه ليش اي ضو ابيض او قوي ممكن يسببلي صداع نصفي متبوع بنوبه غائبه او نوبه بدون اختلاج و حتی هاي ما كنت احس فيها، حتى ما اطول علیکم، بشهر ۳، کنت بحفلة و كانت الضواو قوية و صار معي نوبات صرع متتالية أرعبت كل اللي حولي. بعدها، عملت كتير فحوصات و فكرت اني صرت منيحة، لحد الأسبوع الماضي تقريبا، بدأت عندي نوبات صرع متتالية وخطيرة أكثر وتم نقلي بسيارة إسعاف إلى وحدة العناية المركزة و اضطريت اضل فيها لمدة 6 أيام، كانت التجربة مرعبة ومحبطة ، لكن تم تشخيصي أخيرا و عرفت أني مصابه بالصرع”.
نور طاهر بطلة «مدرسة الورابي» تعاني من الصرع: بصحى على كدمات في جسمي..
وأردفت: “اللى ما بيعرف الصرع هو اصطراب الجهاز العصبي المركزي (عصبي) يصبح فيه نشاط الدماغ غير طبيعي ، مما يتسبب في نوبات أو فترات من السلوك الغير العادي ، والأحاسيس الغريبه وفي معظم الأحيان فقدان الوعي.. من الصعب التعايش مع الصرع ، فهو مش مجرد نوبات مؤقتة وبنصحي منها ، هو انك تصحی علی کدمات مؤلمة في كل جزء من جسمك وما تتذكر كيف اصابتك ، و هو انك تضطر إنك تبصق الدم لأنك عضيت لسانك و باطن تمك أثناءالنوبة، و انك تسمیه متعب قليل عليه!”.
واستطردت نور طاهر: “أنا ممتنه لانه عندي أروع نظام دعم من الناس اللي حولي ، أقرب أصدقائي وعائلتي صبروا كتير، و كانوا مصدر طمأنينة الي وحاولوا يفهموا مرض الصرع ومساعدتي خلال الاوقات الصعبه بتعرفوا حالكم و انا بحبكم).. و كمان شكر خاص للأطباء والممرضات الرائعين الذين خلوا إقامتي في وحدة العناية المركزة تجربة محتملة ، طبيب الأعصاب الدكتور محمد جابر ، والدكتور کریم ناظر ، والممرضات الرائعات یاسمین ، سجی ، بیان ، ورؤی”.
واختتمت: “ما بقدر اكذب عليكم و احكي اني متفائلة و مبسوطة، بس عم بحاول من كل قلبي و هاد بكفي ، لو حدا منكم تشخص بمرض الصرع، انت مش لحالك. انا بدي اشارك قصتي عشان اکون الشخص اللي انا كنت محتاجة احكي معاه، أنا عندي صرع، بس الصرع ما رح يملكني”.
