كتبت – شيماء رستم
اثناء استضافة الإعلامية إسعاد يونس، الليلة لفريق عمل مسلسل ذئاب الجبل احتفالا بمرور ٢٧ عاما علي العمل، اعترفت لها النجمة ميرنا وليد انها كان لديها حلم بطفولتها و قد تحقق اليوم، وافصحت عنه انه كان ان تلتقط صورة مع الفنانة و الإعلامية اسعاد يونس و انها تعلمت درس من هذا الحلم من موقف غير مرتب او متوقع هو عدم تحقيق حلمها في طفولتها علي الرغم من انها كانت جارة “يونس”، وروت عبر حسابها الشخصي الموقف كامل حيث نشرت صورتها برفقة الإعلامية اسعاد يونس و قالت “الصوره دي ليها قصه ماحدش حايصدقها بس انا حكيتها لمدام اسعاد وحاحكيهالكم
وانا طفله قبل ما امثل خالص كنت ساكنه في نفس العماره مع مدام اسعاد في المهندسين، وكان نفسي قوي اتصور معاها عشان كنت بعشقها في بكيزه وزغلول وكنت بتكسف قوي اقولها اني عايزه اتصور معاها وفي يوم صاحبتي كانت عندي وشجعتني وقعدنا جنب الشباك حوالي ٦ ساعات كاملين مستنيين مدام اسعاد ترجع بعربيتها ونطلعلها نقلها نتصور المهم أخيرا هي وصلت والبنت تقوللي يلا ونا اقولها افرضي كسفتنا انا خايفه تقوللي يلا المهم هي اصرت ونا طلعت أقدم رجل وأأخر رجل لحد ما طلعنالها وخبطنا الباب وفتحتلنا ست مش مدام اسعاد يمكن الدادا غالبا قولنالها نفسنا نتصور مع مدام اسعاد قالت لنا هي لسه راجعه تعبانه ومش حاتتصور مع حد وقفلت الباب في وشنا لو قلتلكم كميه العياط اللي عيطتها من كسفتي واحراجي وقلت انا لو مثلت في يوم من الايام عمري ما حاكسف حد ابدا و كإن ربنا بيعلمني درس بدري عشان بعدها ب ٤ سنين بالظبط كنت بعمل فيلم الراعي والنساء وبعده على طول ذئاب الجبل والناس بيجولي يتصوروا معايا ووالله ما بكسفهم ابدا مهما كان عددهم حتى لو في العربيه بتوع الامن في البوابات يقولولي نتصور انزل من العربيه واتصور معاهم واحساس كسفتي يرجعلي وابتسم لهم ونا سعيده
المهم ان مدام اسعاد الجميله قوي لما حكيتلها الموقف اتحرجت وقعدت تعتذرلي قوي وتقوللي حقك عليا مع ان هي نفسها لا كسفتني ولا رفضت تتصور معايا ولا حتى كانت تعرف حاجه عن الموقف ده ولا عارفه تأثيره في حياتي قد ايه
عرفتوا الصوره دي قيمتها النهارده ايه بالنسبه لي ونا بشوفها ؟؟؟لا وايه وهي شخصيا مستضيفاني وبتقوللي يلا نتصور دي حلم عمره اكتر من تلاتين سنه بس تحقق ب اشيك مما كنت عايزاه ربنا يحقق لكم كل احلامكم مهما طال الزمن عليها”.