علقت الفنانة منال سلامة عن شخصيتها في مسلسل الأصلي، الذي يتم عرضه خلال الفترة الحالية عبر شاشة قناة dmc، كما تحدثت التقنية الخاصة بها في التجهيز للمشاهد.
وتحدثت منال سلامة كواليس شخصيتها فايزة التي تلعبها في مسلسل الأصلي، وذلك خلال حوارها بـ برنامج عيش صباحك على نجوم إف إم، حيث قالت: «أنا معترضة على فكرة إنها شريرة، فايزة سيدة مكملتش تعليمها، وأبوها ميز أختها عنها، وأتجوزت شخص كان بيحب أختها».
وأضافت: «فايزة هي شخصية مش متحققة في كل حاجة، وبتطالب بورثها بطريقة تسخين أخواتها على فاطمة، وتبان قدام فاطمة إنها غلبانة، ولكن هي مش شريرة خالص والناس هتكتشف إنها إنسانيتها وليه وصلت للحالة اللي هي فيها دي، ويهمني دايمًا إن لما الناس تقفل التليفزيون تفتكر شخصياتي، سواء فايزة في الأصلي، أو دوري في الملكة نازلي».
وكشفت منال سلامة كيفية تحضيرها لمشاهدها في أي عمل، حيث قالت: «من أول ما بدأت تمثيل عملت لنفسي كراسة بكتب فيها كل مشاهدي وملابسي فيها، وبعد شوية فهمت إن دي شغلانة حد في اللوكيشن اسمه الراكور، ولما اشتغلت مع أستاذ نور الشريف لقيته بيعمل نفس الشيء، وأضاف لي تفاصيل كتيرة ونصحني إني أخد بالي من التفاصيل واللزمات، وده بيريح المخرج لأنه عارف إنه بمجرد ما هيقول لي المشهد اللي هصوره دلوقتي، هيلاقيني جاهزة باللبس الخاص به بسرعة».
